„მაჟორიტარული სისტემით არჩეული პარლამენტის წევრის ბიუროს ფუნქციების, ორგანიზებისა და საქმიანობის წესის და პარლამენტის ბიუჯეტიდან ბიუროსთვის გამოყოფილი თანხის განკარგვის წესის განსაზღვრის შესახებ“ საქართველოს პარლამენტის ბიუროს 2013 წლის 7 თებერვლის გადაწყვეტილებით დამტკიცებულ დებულებაში ცვლილების შეტანის თაობაზე იმსჯელა დღევანდელ სხდომაზე საპროცედურო საკითხთა და წესების კომიტეტმა.

მომხსენებლის, საპროცედურო საკითხთა და წესების კომიტეტის თავმჯდომარის, გურამ მაჭარაშვილის განმარტებით, იქიდან გამომდინარე, რომ საკონსტიტუციო ცვლილების შესაბამისად ქვეყანაში 73 - ის ნაცვლად ამჟამად 30 სამაჟორიტარო ოლქია და თითოეულში რამდენიმე მუნიციპალიტეტია უკვე გაერთიანებული, აღნიშნული დებულება ახლებურად დაარეგულირებს მაჟორიტარების ბიუროების ფუნქციონირებისა და დაფინანსების წესს. შესაბამისად, საჭირო გახდა გარკვეული ტიპის, მათ შორის ტექნიკური ხასიათის ცვლილებების განხორციელება.

პროექტით წარმოდგენილი ცვლილებები დაარეგულირებს სამაჟორიტარო ბიუროების დაფინანსების საკითხს.

ასევე, რამდენადაც მაჟორიტარული ბიუროს წევრები პრაქტიკულად პარლამენტის აპარატის თანამშრომლები ხდებიან, მათზეც გავრცელდება ბევრი შეღავათი, მათ შორის დაზღვევის მექანიზმი და სხვა, სწორედ აქედან გამომდინარე განისაზღვრება ხელფასის მინიმალური და მაქსიმალური ოდენობაც პარლამენტის აპარატის თანამშრომლების ანალოგიურად.

დებულების პროექტი ასევე ითვალისწინებს ტექნიკური ხასიათის ცვლილებებს.

კომიტეტის წევრებმა მხარი დაუჭირეს წარმოდგენილ პროექტს, რომელსაც პარლამენტი უახლოეს პლენარულ სხდომაზე განიხილავს.