საარჩევნო კანონმდებლობისა და წინასაარჩევნო კამპანიის მიმდინარეობის შესწავლის მიზნით საქართველოში მყოფი ევროპის საბჭოს საპარლამენტო ასამბლეის დელეგაცია დღეს ქვეყნის ხელისუფლებისა და პოლიტიკური პარტიების წარმომადგენლებს შეხვდება.

ამ დროისთვის შეხვედრა კოალიცია „ქართული ოცნების“ ლიდერებთან მიმდინარეობს.

დელეგაციის წევრებს, მოგვიანებით, პარლამენტში უმაღლესი საკანონმდებლო ორგანოს თავმჯდომარე დავით ბაქრაძე მიიღებს.

სტუმრები დღესვე, პარლამენტის შენობაში, სახალხო დამცველს გიორგი ტუღუშს, „ქრისტიან-დემოკრატიული მოძრაობისა“ და „ახალი მემარჯვენეების“ წარმომადგენლებს შეხვდებიან.

სასტუმრო „თბილისი მარიოტში“ კი, შეხვედრა „ლეიბორისტული პარტიის“ ლიდერებთან შედგება.

დელეგაციას დაგეგმილი აქვს შეხვედრა სახელმწიფო აუდიტის სამსახურის ხელმძღვანელთან ლაშა თორდიასთან.

დღესვე, დაგეგმილია შეხვედრა პრეზიდენტ მიხეილ სააკაშვილთან უწყებათაშორისი კომისიის თავმჯდომარესთან, ეროვნული უშიშროების საბჭოს მდივანთან გიგა ბოკერიასთან და საგარეო საქმეთა მინისტრთან გრიგოლ ვაშაძესთან.

დელეგაცია ორდღიანი ვიზიტით საქართველოს გუშინ ეწვია და შეხვედრები გამართა ცესკო-ს თავმჯდომარესთან, ამომრჩეველთა სიის დაზუსტების უზრუნველყოფის კომისიის თავმჯდომარესთან, დიპლომატიური კორპუსისა და სამოქალაქო საზოგადოების წარმომადგენლებთან.

ევროპის საბჭოს საპარლამენტო ასამბლეა საბოლოო დასკვნას ხმის მიცემის პროცესის შემდეგ გააკეთებს. ამ მიზნით, 1 ოქტომბრისთვის საქართველოს ასამბლეის 21-კაციანი დელეგაცია ეწვევა.