"თუ გადავავლებთ თვალს სტატისტიკას, პარლამენტში ქალთა წარმომადგენლობით პარლამენტში საქართველო არის ერთ-ერთი აუტსაიდერი არა მხოლოდ ევროპაში, არამედ მსოფლიოს სახელმწიფოებს შორისაც კი. ძალიან დაბალი მაჩვენებელია ჩვენთან", - განაცხადა ტვ "იმედის" ეთერში " ქართული ოცნების" აღმასრულებელმა მდივანმა, ირაკლი კობახიძემ. მისი ინფორმაციით, დღეს პარლამენტის 150 დეპუტატის შორის მხოლოდ 21 ქალია. მისივე მოსაზრებით, ეს დაბალი პროცენტული მაჩვენებელი არ მეტყველებს კარგად ქვეყანაზე.



"მაგალითად, როდესაც ჩვენი პარტნიორები ეცნობიან ასეთ სტატისტიკას, მათში გარკვეულ უარყოფით აღქმას იწვევს ეს ფაქტი. შესაბამისად, არსებული სურათი შესაცვლელია. მართალია, ყოველ 4 წელიწადში იყო გარკვეული ზრდა, თუმცა ესეც არის ძალიან მცირე მაჩვენებელი. თუ საზოგადოებაში ქალებისა და მამაკაცების რესურსებს ავიღებთ, ბალანსი ბევრად უფრო განსხვავებულია, ვიდრე ვხედავთ სურათს პარლამენტში. იმისათვის, რომ ეს პროცესი დავაჩქაროთ, გარკვეული წამახალისებელი ზომებია საჭირო. ეს წამახალისებელი ზომაა სწორედ გენდერული კვოტა.",- განაცხადა ირაკლი კობახიძემ.



მისი თქმით, გენდერული კვოტის შესაბამისად, 2020 წლის არჩევნების შემდეგ უკვე მინიმუმ 30 ქალი იქნება წარმოდგენილი საქართველოს პარლამენტში, თუმცა შეიძლება იყოს მეტიც; 2024 წლის არჩევნებზე იქნება მინიმუმ 37 ქალი წარმოდგენილი, ხოლო 2028 წელს - მინიმუმ 50 ქალი.

"თანდათანობით დავუახლოვდებით იმ ოპტიმალურ სურათს, რომელიც განვითარებულ ქვეყნებს ახასიათებს და რომელიც იქნება უფრო ბუნებრივი ქართული საზოგადოებისთვის. გვჯერა, რომ არის უამრავი კომპეტენტური ქალი, რომელსაც შეუძლია ძალიან კარგად გაართვას თავი პარლამენტარის ფუნქციებს",- განაცხადა ირაკლი კობახიძემ.