ამერიკის შეერთებული შტატების სენატორები „ქრისტიან-დემოკრატიული მოძრაობის“ ლიდერებს შეხვდნენ.

შეხვედრა 35 წუთი გაგრძელდა და მას მოძრაობის ლიდერები გიორგი თარგამაძე, ლევან ვეფხვაძე და მაგდა ანიკაშვილი ესწრებოდნენ.

სენატორებისა და ოპოზიციის ლიდერების შეხვედრის მთავარი თემა 1 ოქტომბერს დაგეგმილი საპარლამენტო არჩევნები იყო.

„ქრისტიან-დემოკრატებმა“ სენატორებს წინასაარჩევნო პერიოდში არსებულ სიტუაციასა და არჩევნებისთვის მზადების პროცესზე დეტალური ინფორმაცია მიაწოდეს.

შეხვედრაზე საუბარი ასევე, იმ საერთაშორისო გამოწვევებს შეეხო, რომლის წინაშეც საქართველო დგას. აღნიშნულ თემაზე „ქრისტიან-დემოკრატებმა“ ამერიკელ სენატორებს საკუთარი ხედვა გააცნეს.

როგორც შეხვედრის დასრულების შემდეგ გიორგი თარგამაძემ აღნიშნა, სენატორები ჯონ მაკკეინი და ჯოზეფ ლიბერმანი საქართველოს ტრადიციულად უჭერენ მხარს, აქედან გამომდინარე, შეხვედრაზე საქართველოს სუვერენიტეტის მხარდაჭერის გაძლიერებისთის დამატებითი არგუმენტების მოტანა არ გამხდარა საჭირო.

„მათი სურვილია, რომ საპარლამენტო არჩევნებზე საქართველომ დემოკრატიულობის ტესტი უკეთესად ჩააბაროს, რათა ამას კიდევ უფრო მეტი ინვესტიცია, მეტი უსაფრთხოების განცდა და საქართველოს გაერთიანების მეტი პერსპექტივა მოყვეს“ - განაცხადა თარგამაძემ.

შეხვედრას საქართველოში ამერიკის ახალი ელჩი რიჩარდ ნორნალდიც ესწრებოდა.