საქართველოს პრეზიდენტის მიხეილ სააკაშვილის განცხადებით, საპარლამენტო არჩევნები თავისუფალ გარემოში ჩატარდება.

ამის შესახებ მიხეილ სააკაშვილმა დღეს ნატო-ს გენერალურ მდივან ანდერს ფოგ რასმუსენთან ერთად გამართულ პრესკონფერენციაზე განაცხადა.

როგორც მიხეილ სააკაშვილმა აღნიშნა, ქართველი ხალხი არანაირ ესკალაციას არ დაუშვებს, ამაზე კი, ყველანაირი გამოკითხვა მეტყველებს.

მისი თქმით, ქართველ ხალხს დღეს ქვეყანაში არსებული სისტემის სწამს. შესაბამისად, საქართველოს ხელისუფლება უზრუნველვყოფს იმას, რომ არჩევნები მაქსიმალურად გამჭვირვალე პირობებში ჩატარდეს.

„საქართველოში სხვადასხვა დონის რადიკალები ყოველთვის იყვნენ. ასევე, ყოველთვის იყო გარედან ჩარევის მცდელობა, მაგრამ ნურავის ნურაფრის იმედი ნუ ექნება. ეჭვიც არ მეპარება, რომ არჩევნები დემოკრატიის ყველა პრინციპების დაცვით ჩატარდება“ - განაცხადა სააკაშვილმა.

მისი თქმით, ყოველთვის შეიძლება ვიღაცის ყიდვა საქართველოს შიგნითაც და უცხოეთშიც, მაგრამ საქართველო არ გაიყიდება, რადგან დემოკრატიული სამყარო არ იყიდება.

„საერთო ჯამში, ქართველი ხალხი დემოკრატიის პრინციპებზე დაყრდნობით აბსოლუტურად სწორ არჩევანს გააკეთებს. ამაში დარწმუნებული ვარ. მე, როგორც პრეზიდენტი ვუზრუნველყოფ იმას, რომ თითოეული მოქალაქის უფლება, დემოკრატიის ფუნდამენტური ღირებულებები, როგორი შეხედულებებისაც არ უნდა იყოს ის, გამოხატული იყოს. საბოლოო ჯამში საღი აზრი ყოველთვის იზეიმებს“ - განაცხადა სააკაშვილმა.

მისივე შეფასებით, არჩევნების დემოკრატიულად ჩატარება საქართველოს ევროატლანტიკურ მისწრაფებებს შეესაბამება.