საპარლამენტო არჩევნების წინა პერიოდში კახეთის რეგიონში არსებული მდგომარეობის გასაცნობად, ეუთოს დემოკრატიული ინსტიტუტებისა და ადამიანის უფლებების   ოფისის წარმომადგენლები (ODIHR) არტურ აღამალიანი და სესილია სალემარკო პოლიტიკური პარტია „თავისუფალი საქართველოს“ კახეთის ორგანიზაციის თავმჯდომარეს გიორგი მოსიაშვილს და აპარატის უფროსს ლალი კბილაშვილს შეხვდნენ.

როგორც „ნიუსპრესს“ „თავისუფალი საქართველოს“ პრესსამსახურიდან აცნობეს, შეხვედრის მიზანი 2012 წლის საპარლამენტო არჩევნების წინა პერიოდში რეგიონის მასშტაბით მიმდინარე პროცესების გაცნობა იყო.

შეხვედრაზე მოსიაშვილმა ეუთოს წარმომადგენლებს არჩევნებთან დაკავშირებული დარღვევები გააცნო, რაც პარტიის წარმომადგენლებზე ფიზიკურ ზეწოლას, კოორდინატორებზე მუქარას, პარტიის რაიონული ოფისების იჯარის მოშლას, რეგიონული ორგანიზაციის ოფისის შეგნებულად დაზიანებას, მედიის არათანაბარ ხელმისაწვდომობას, ხელისუფლების მხრიდან ადმინისტრაციული რესურსის გამოყენებას და სხვა საკითხებს ეხება.

პრესსამსახურის ცნობით, ეუთოს წარმომადგენლები საკითხით დაინტერესდნენ და შემდგომი თანამშრომლობის სურვილი გამოთქვეს.