კავკასიის რეგიონში სტაბილურობისა და სიმშვიდის შენარჩუნების პროცესში ყველა პარტნიორმა თავისი წვლილი უნდა შეიტანოს - ამის შესახებ პოლონეთის საგარეო საქმეთა მინისტრმა რადოსლავ სიკორსკიმ სასტუმრო „რედისონ ბლუ ივერიაში“ გამართულ პრესკონფერენციაზე განაცხადა, რუსეთის სამხედრო წვრთნების „კავკასია 2012“-ის საქართველოში საარჩევნო პერიოდის პარალელურად ჩატარებასთან დაკავშირებით.

„იმედი მაქვს, რომ რეგიონის ყველა პარტნიორი ამ სენსიტიურ დროს სტაბილურობის შენარჩუნებაში თავის წვლილს შეიტანს. ყველაფერი უნდა გაკეთდეს სიმშვიდის განსამტკიცებლად“ - განაცხადა სიკორსკიმ.

როგორც შვედეთის საგარეო საქმეთა მინისტრმა კარლ ბილდტმა აღნიშნა, რუსეთის სამხედრო წვრთნები ზედმეტი წუხილის საგანი არ უნდა გახდეს. მისი თქმით, ყველა წვრთნა გარკვეული გრაფიკის მიხედვით ტარდება. „ეს მანევრებიც გარკვეული გრაფიკის ფარგლებში წარიმართება, რაც არ უნდა გახდეს ზედმეტი წუხილის საფუძველი“ - განაცხადა მან.

„კავკასია 2012“ ჩრდილოეთ კავკასიის რეგიონში სექტემბერშია დაგეგმილი. ცოტა ხნის წინ, რუსეთმა მიიღო გადაწყვეტილება, რომ წვრთნების ჩასატარებლად აღარ გამოიყენებს ჩეჩნეთის ტერიტორიაზე არსებულ პოლიგონებს, რათა საქართველოს საზღვართან ზედმეტი დაძაბულობა არ შეიქმნას.