კოალიცია „ქართული ოცნების“ ერთ-ერთი ლიდერი დავით უსუფაშვილი აცხადებს, რომ არჩევნების გაყალბების თავიდან აცილების მიზნით, კოალიციის წარმომადგენლები  საარჩევნო უბნებზე „ქართული ოცნების“ მიერ ჩატარებული „კარდაკარის“ მიხედვით დაზუსტებული სიებით იხელმძღვანელებენ.

როგორც უსუფაშვილმა დღეს გამართულ ბრიფინგზე განაცხადა, სიების დაზუსტების უზრუნველყოფის სახელმწიფო კომისიამ ამომრჩეველთა ზუსტი სიის შედგენა ვერ მოახერხა და აღნიშნულ საკითხთან დაკავშირებული პრობლემები კვლავ აღმოუფხვრელია.

უსუფაშვილი აცხადებს, რომ მთავარი პრობლემური საკითხი სიაში მიწერილი და უცხოეთში მყოფი ელექტორატია.

მისივე თქმით, სახელმწიფო კომისიამ 111 ათასზე მეტი მიწერილი ამომრჩეველი რეგისტრაციიდან მოხსნა, თუმცა, ისინი ამომრჩეველთა სიაში მაინც შედიან. ამასთან, სიაში რჩება ის 77 ათასზე მეტი ამომრჩეველი, რომელიც მისამართებიდან ბინის მფლობელთა მოთხოვნის საფუძველზე მოიხსნა.

ამგვარად, უსუფაშვილის განცხადებით, მიწერილი ამომრჩევლის რაოდენობა სიაში, დაახლოებით, 200 ათასსის. ასევე, მისი თქმით, სიაში შეყვანილია უცხოეთში მყოფი ნახევარ მილიონზე მეტი საქართველოს მოქალაქე, რომელთაც სხვა ქვეყანაში არჩევნებში მონაწილეობის საშუალება არ ეძლევათ.

„აღნიშნული ორი პრობლემა განსაკუთრებულ მნიშვნელობას იძენს ორი ფაქტორის გამო - ნახევარ მილიონზე მეტი ამომრჩევლის არსებობა სიებში უცხოეთში ყოფნის მითითების გარეშე, პლუს ის ბუნდოვანი წარმომავლობის 200 ათასი ამომრჩეველი სიაში ქმნის დაახლოებით, 700 ათასამდე ისეთ ჩანაწერს, რომლის გამოყენებას ხელისუფლება არჩევნების გაყალბებისთვის გეგმავს“-აღნიშნა მან.

უსუფაშვილი აცხადებს, რომ კოალიციამ ჩაატარა ალტერნატიული „კარდაკარი“ და ამომრჩეველთა რაოდენობის შესახებ ზუსტი ინფორმაცია აქვს. შესაბამისად, მისი თქმით, არჩევნების დღეს “ქართული ოცნების“ წარმომადგენლები საარჩევნო უბნებზე „კარდაკარის“ შედეგად შემუშავებული სიით იხელმძღვანელებენ და გაყალბების ნებისმიერ მცდელობას ვიდეო-კამერით დააფიქსირებენ.