საქართველოს პრემიერ-მინისტრმა ვანო მერაბიშვილმა გურჯაანის რაიონის სოფელ კარდენახში აფრიაშვილების ოჯახის წევრებთან  ერთად, რთველში მიიღო მონაწილეობა.

შემდეგ, პრემიერი ოჯახის უფროსთან ერთად კოტეხის ღვინის ქარხანას ეწვია და ყურძნის ჩაბარების პროცესს დაესწრო.

ყურძნის ჩაბარების შემდეგ, კარდენახელ გლეხს ქარხანაში ვაუჩერი გადაეცა, რომელიც მან ბანკში გაანაღდა.

ქარხნის წარმომადგენლის განცხადებით, კოტეხის ღვინის ქარხანას დღეში 150 ტონა ყურძნის მიღება და გადამუშავება შეუძლია.

მერაბიშვილის თქმით, კახეთი სტიქიამ უკვე ორჯერ დააზარალა და ამდენად, მთავრობის გადაწყვეტილებით, სუბსიდირების თანხა გასულ წელთან შედარებით, შავ ყურძენზე 25 თეთრიდან 35 თეთრამდე, ხოლო თეთრ ყურძენზე 15 თეთრიდან 25 თეთრამდე გაიზრდება.

გარდა ამისა, პრემიერის თქმით, კახეთის რეგიონში გაიხსნება ყურძნის ჩამბარებელი 55 პუნქტი, სადაც 1 კგ შავი ყურძნის ჩაბარება 1 ლარად იქნება შესაძლებელი. პრემიერ-მინისტრმა ასევე აღნიშნა, რომ კომპანიები დაზიანებულ ყურძენსაც შეისყიდიან, რომლის ფასი 1 კგ-ზე 35 თეთრიდან დაიწყება.