ექსპერტი სოსო ცისკარიშვილი აცხადებს, რომ 2 ოქტომბერს ხალხის ქუჩაში გამოსვლა არა კოალიცია „ქართულ ოცნებას“, არამედ „ნაციონალურ მოძრაობას“ სურს, რადგან მას პოლიტიკურ ოპონენტებთან კამათის სხვა მეთოდი არ გააჩნია.

ამის შესახებ ცისკარიშვილმა დღეს „ნიუსპრესთან“ საუბარში განაცხადა.

„შესაბამისად, თუკი ვინმეს ქუჩაში გამოიტყუებენ, აღმოჩნდება, რომ საარჩევნო ბრძოლის იარაღს თავად მმართველი ძალა ირჩევს და ეს იარაღი მისთვის უკვე კარგად ცნობილი ცრემლსადენი გაზი და რეზინის ხელკეტი იქნება“ - განაცხადა ცისკარიშვილმა და დასძინა, რომ ამისთვის მზაობა და პროცესების ქუჩაში წარმართვის ოცნება „ნაციონალურ მოძრაობაში“ დიდი ხანია არსებობს.

რაც შეეხება „ქართული ოცნების“ ლიდერის ბოლო დროინდელ შეხვედრას „დემოკრატიული მოძრაობა-ერთიანი საქართველოს“ თავმჯდომარე ნინო ბურჯანაძესთან, ცისკარიშვილი აცხადებს, რომ ქუჩის აქციები ბურჯანაძის არჩევანი არასდროს ყოფილა. ექსპერტის თქმით, „დემოკრატიული საქართველოს“ ლიდერს აქციებში ჩაბმას ხელისუფლების უკანონო ქმედებები აიძულებდა.

„ცივილიზებულობის დონით ბურჯანაძე საქართველოში არც ერთ პოლიტიკოსს არ ჩამოუვარდება. პოლიტიკურ პერსპექტივას ის თავადაც სიამოვნებით გაარკვევდა მხოლოდ საარჩევნო ყუთთან და არა რაიმე ტიპის ძალადობრივი აქციებისას“ - განაცხადა მან და დასძინა, რომ ბურჯანაძეს ქუჩის პოლიტიკის მიმდევრის იარლიყი, ისევე როგორც პრორუსულობა, ძალიან იოლად და უსამართლოდ „მიაკერეს“, რადგან ექსპერტს არ მიაჩნია, რომ მოსკოვში რაიმე სახის ვიზიტი ვინმეს პრორუსულობაზე მეტყველებს.

„რუსეთში მუდმივად დადიან სხვადასხვა ქვეყნის პოლიტიკოსები, მაგრამ ისინი „რუსეთუმეებად“ არავის მიუჩნევია“- აღნიშნა ცისკარიშვილმა.

რაც შეეხება კოალიციის სხვა სუბიექტებს - „რესპუბლიკელებსა“ და „თავისუფალ დემოკრატებს“, რომლებიც ქუჩის აქციების მიმართ უარყოფით დამოკიდებულებას აფიქსირებენ, ცისკარიშვილი აცხადებს, რომ კოალიციას ლიდერი ჰყავს და გადაწყვეტილებას ის იღებს, ლიდერის დაუკითხავი მოქმედება კოალიციიდან გასვლას ნიშნავს.