ცნობილმა ქართველმა სპორტსმენმა და ველომოგზაურმა ჯუმბერ ლეჟავამ „ქართულ ოცნებას“ მხარდაჭერა გამოუცხადა.

ლეჟავა „ქართული ოცნების“ ლიდერს ბიძინა ივანიშვილს შეხვდა.

„3 თვეა რაც საქართველოში ჩამოვედი და ვხედავ, რომ ხელისუფლებას არასწორი დამოკიდებულება აქვს ხალხის მიმართ. მიმაჩნია, რომ იმ მხარეს უნდა დავუდგე გვერდით, რომელიც ახლა ხელფეხშეკრულია და გამარჯვებისთვის იბრძვის. თუმცა, ვფიქრობ, რომ ბრძოლაც არ იქნება საჭირო ისე დამარცხდებიან ისინი, თვითონ იმარცხებენ საკუთარ თავს, თავისი მოქმედებებით“- აღნიშნა ლეჟავამ.

ბიძინა ივანიშვილის თქმით, ხელისუფლება ცდილობს ქართველი ხალხი დაიმონოს, თუმცა, მისივე თქმით, ამას ვერ შეძლებს.

„ქართველები ნიჭიერები ვართ-მეთქი ვამბობდი. ნიჭმა ამ კაცში ამოხეთქა. უბრალო საქმე არაა ველოსიპედით მსოფლიო შემოიარო. ამას დიდი პრინციპები სჭირდება. ასეთ ხალხს ვერავინ დაიმონებს ან 21-ე საუკუნეში რატომ უნდა მოგივიდეს ისეთი აზრები, რომ ვინმეს დამონება მოინდომო“- განაცხადა ივანიშვილმა.

ჯუმბერ ლეჟავას თქმით, ბოლო მოგზაურობისას მას 12 ქვეყანაში დახვედრა მოუწყეს, საფრანგეთში კი, „მოგზაურთა მეფე“ შეარქვეს.

მისივე განცხადებით, იგი ლონდონში ოლიმპიური თამაშების მიმდინარობისას ჩავიდა, თუმცა, ქართული დელეგაციის მხრიდან არავინ გამოხმაურებია.

„ჩავედი ლონდონში და ჩვენები დამემალნენ. მათი ტელეფონის ნომერი, თითქოს, არც საელჩომ იცოდა და სად ცხოვრობდნენ ისიც არ იცოდნენ. არაფრად ჩამთვალეს. თუმცა, ეს ჩემი შეურაცხყოფა კი არ იყო, ყველა ელოდებოდა როგორ მიმიღებდა ქართული დელეგაცია“- განაცხადა ლეჟავამ.