საქართველოს საგარეო საქმეთა მინისტრმა გრიგოლ ვაშაძემ ბუქარესტში გამართულ ამბასადორიალში მიიღო მონაწილეობა, რომელიც რუმინეთის დიპლომატიური სამსახურის დაარსების 150 წლისთავს მიეძღვნა.

ღონისძიებაზე საპატიო სტუმრის სტატუსით მიწვეული ვაშაძე სიტყვითაც გამოვიდა.

საგარეო უწყების ხელმძღვანელმა ორმხრივი შეხვედრებიც გამართა, რომელზეც რუმინეთის ოფიცილურმა პირებმა საქართველოს ტერიტორიული მთლიანობისადმი მხარდაჭერა გამოხატეს.

შეხვედრებზე საუბარი ეკონომიკური თანამშრომლობის გაღრმავებას, შავი ზღვის პორტების საბორნე მიმოსვლასა და ერთობლივი ენერგეტიკული პროექტების განხორციელების შესაძლებლობებსაც შეეხო.

ამასთან, შეხვედრის ფარგლებში საქართველოსა და რუმინეთს შორის კავშირგაბმულობისა და კომუნიკაციების სფეროში თანამშრომლობის შესახებ მემორანდუმიც გაფორმდა.

„ჩვენ პრეზიდენტისა და პრემიერისგან გვაქვს ინსტრუქცია, რომ გარდა პოლიტიკური საკითხებისა, ასეთი შეხვედრებისას ეკონომიკური თანამშრომლობაც სხვა ეტაპზე გადავიყვანოთ. გვინდა, პარტნიორები ჩავრთოთ მთავრობის პროგრამის შესრულებაში, რომელიც სოფლის მეურნეობის, ჯანდაცვის, პენსიების და დასაქმების საკითხებს ეხება“-აღნიშნა ვაშაძემ და დასძინა, რომ რუმინეთი საქართველოსთვის მნიშვნელოვანი სტრატეგიული პარტნიორია.