საარჩევნო ბლოკ „ბიძინა ივანიშვილი-ქართული ოცნების“ ლიდერი ბიძინა ივანიშვილი აფხაზეთიდან დევნილ მოსახლეობას  შეხვდა და აფხაზეთის დაბრუნების გზების ძიებისა და დევნილთა პირობების გაუმჯობესების კუთხით ბლოკის ხედვა გააცნო.

როგორც ივანიშვილმა შეხვედრაზე აღნიშნა, აფხაზეთიდან დევნილებთან დაკავშირებით უფრო მძიმეა მდგომარეობაა, რადგან მათი საცხოვრებელი სახლები დაკავებულია.

მისი თქმით, სიტუაცია არც გორთან ახლოს და არც ე.წ სამხრეთ ოსეთთან არის მარტივი, მაგრამ აფხაზეთიდან დევნილების მდგომარეობა გაცილებით რთულია.

„პირველ რიგში რაც დევნილ მოსახლეობას აინტერესებს და რასაც ბევრი ინვესტიცია არ დასჭირდება, იმ სახელმწიფო შენობების სწრაფად დაკანონებაა, რომლებითაც ისინი სარგებლობენ. ხელისუფლებაში მოსვლის პირველივე დღეს გამოვცემთ დოკუმენტს იმის შესახებ, რომ საცხოვრებელი, რითაც დღეს სარგებლობთ, დაგიკანონდეთ“ - განაცხადა ივანიშვილმა.

მისი თქმით, ყველაზე რთული და ხანგრძლივი დევნილების საკუთარ სახლებში დაბრუნება იქნება, ამისთვის კი, არანაკლებ 4 და არაუმეტეს 6 მილიარდი აშშ დოლარია საჭირო.

„ამის შესაძლებლობა არსებობს. ძალიან ბევრი სახლი იქნება ასაშენებელი - რეალურად, არანაკლებ 100 000 სახლი უნდა აშენდეს. ვიცი მაგალითები, ვინც თქვენი ქონება მიისაკუთრა და იქ ცხოვრობს. ამას მარტო პოლიტიკური განცხადებები არ უშველის, ამას ძალიან დიდი ეკონომიკური ძალისხმევა დასჭირდება“- აღნიშნა ივანიშვილმა.

მისივე თქმით, ევროპული ტიპის სახლის ასაშენებლად საშუალოდ, დაახლოებით, 60 000 აშშ დოლარია საჭირო და ეს ის სამარცხვინო სახლები არაა, რაც დევნილებს აუშენეს.

ივანიშვილის განცხადებით, ვიდრე აფხაზეთის დაბრუნების საკითხზე მოლაპარაკება მიმდინარეობს, დევნილებისთვის ნორმალური საცხოვრებელი პირობების შესაქმნელად, თანხების მობილიზება მოხდება.