საარჩევნო ბლოკ „ბიძინა ივანიშვილი-ქართულ ოცნებაში“ მიაჩნიათ, რომ ხელისუფლება ამომრჩეველთა სიების საშუალებით არჩევნების გაყალბებას აპირებს.  

როგორც დღეს გამართულ პრესკონფერენციაზე „ქართული ოცნების“ პრესსპიკერმა მაია ფანჯიკიძემ განაცხადა, დადასტურებული ფაქტია, რომ ერთი მილიონი ამომრჩეველი საქართველოს ფარგლებს გარეთაა გასული, ხოლო ამომრჩეველთა სიაში იდენტიფიცირებულია მსგავსი მხოლოდ 283 ათასი მოქალაქე.

პრესსპიკერის განმარტებით, საზღვარგარეთ მყოფი 700 ათასი ამომრჩეველი იდენტიფიცირების გარეშეა დარჩენილი, ხოლო ხელისუფლება მათი სახელით არჩევნებზე მანიპულირებას გეგმავს.

„საარჩევნო სიებით მანიპულირება არის ერთ-ერთი მეთოდი, რომლითაც ხელისუფლება არჩევნების გაყალბებას აპირებს. ხელისუფლება ცდილობს მინიმუმამდე დაიყვანოს ამომრჩეველთა სიებში საზღვარგარეთ გასულ პირთა რიცხვი და შემდეგ მათი სახელით არჩევნებზე მანიპულირება მოახდინოს“ - აღნიშნა ფანჯიკიძემ.

მისივე თქმით, ემიგრანტებს ხმის მიცემაც ურთულდებათ, რადგან არჩევნები ორშაბათსაა დანიშნული, რომელიც სამუშაო დღეა.

„ქართულ ოცნებაში“ აცხადებენ, რომ ცესკო საზღვარგარეთ არც დამატებითი საარჩევნო უბნების გახნას გეგმავს, რაც სიტუაციას კიდევ უფრო გაართულებს, ხოლო 700 ათასი ემიგრანტის ხმას ხელისუფლება გასაყალბებლად გამოიყენებს.