„ახალი საარჩევნო სისტემა დაბალანსებული სისტემაა წარმომადგენლობის თვალსაზრისით. შემცირდა მაჟორიტარების რაოდენობა, გაიზარდა პროპორციული წესით არჩეული დეპუტატების რაოდენობა და შესაბამისად, პლურალიზმის ხარისხი, ამ შემთხვევაში, იქნება იმაზე მაღალი, ვიდრე ეს იყო გასულ წლებში. ჩვენი ამოცანა იყო შეგვექმნა ისეთი სისტემა, რომელიც თანაბრად მისაღები იქნებოდა როგორც საპარლამენტო უმრავლესობის წევრებისთვის, მათ შორის მაჟორიტარებისთვის, ასევე ოპოზიციური პარტიებისთვის. ჩვენ მოვახერხეთ სწორედ ასეთი მოდელის შემუშავება“, - განაცხადა „ქართული ოცნების“ აღმასრულებელმა მდივანმა ირაკლი კობახიძემ ტვ ,,იმედის" გადაცემა ,,ღია ეთერში".

მისი თქმით, უმრავლესობის დეპუტატების ინტერესი მდგომარეობდა იმაში, რომ საარჩევნო სისტემაში სტაბილურობის კომპონენტი ყოფილიყო სათანადოდ გათვალისწინებული.
„ამ შემთხვევაში, ეს სისტემა იძლევა სტაბილური უმრავლესობის ჩამოყალიბების და სტაბილური მთავრობის ფორმირების საშუალებას, ასევე შენარჩუნებულია მაჟორიტარული კომპონენტი, რაც იყო მაჟორიტარების ერთ-ერთი მოთხოვნა.

რაც შეეხება ოპოზიციის მოთხოვნას, ჩვენს მიერ შემუშავებული ახალი მოდელი, შედეგის თვალსაზრისით, პრაქტიკულად იდენტურია სრულად პროპორციული მოდელის ხუთ პროცენტიანი ბარიერით. შესაბამისად, ყველას ინტერესია გამოხატულია ამ ახალ მოდელში“, - აღნიშნა ირაკლი კობახიძემ.