რუსეთის სამეთაურო-საშტაბო სამხედრო წვრთნების „კავკასია 2012“-ის გეოგრაფიული არეალის შეცვლას და საქართველოს სახელმწიფო საზღვრებიდან გადატანას „კონფლიქტების  და მოლაპარაკებების საერთაშორისო ცენტრის“ დირექტორი გოგი ხუციშვილი დადებით მოვლენად აფასებს.

როგორც ხუციშვილმა „ნიუსპრესს“ განუცხადა, აღნიშნული წვრთნები საქართველოში წინასაარჩევნო პერიოდის გათვალისწინებით დაძაბულობის ძალიან დიდ ფაქტორს წარმოადგენს.

„როგორც ჩანს, გადაწყვიტეს სწავლება მოაცილონ საქართველოს საზღვრებს იმისთვის, რომ რუსეთმა თავიდან აიცილოს ბრალდებები და დაამტკიცოს, რომ არ აპირებს ამ წვრთნების გამოყენებას საქართველოში შემოსაჭრელად, რის შესახებაც სხვადასხვა განცხადებები კეთდებოდა“ - აღნიშნა ხუციშვილმა.

ის დარწმუნებულია, რომ რუსეთმა ეს გადაწყვეტილება საერთაშორისო თანამეგობრობის - აშშ-სა და ევროკავშირის ძალიან დიდი ზეწოლის შედეგად მიიღო, რაც მასზე რეგიონში დაძაბულობისა და დესტაბილიზაციის ფაქტირების მოხსნის მიზნით ხორციელდებოდა.

გაზეთი „იზვესტია“ რუსეთის თავდაცვის სამინისტროს წყაროზე დაყრდნობით იტყობინება, რომ „კავკასია 2012“ გეოგრაფიული არეალიდან ჩეჩნეთის ტერიტორია ამოირიცხა და წვრთნები საქართველოს სახელმწიფო საზღვრის სიახლოვეს აღარ ჩატარდება.

კერძოდ, 17-23 სექტემბერს დაგეგმილი წვრთნების სიიდან ამოღებულია ჩეჩნეთში განლაგებული სასწავლო-საწვრთნელი კომპლექსები; „ალპიისკი“, „გვარდეისკი“ და „კალინოვსკი“.