ექსპერტს კავკასიის საკითხებში, მამუკა არეშიძეს ლოპოტას ხეობაში ჩატარებულ სპეცოპერაციის ვერსიებზე დეტალური საუბარი ამ ეტაპზე არ სურს,  თუმცა ცალსახად აცხადებს, რომ ქართველი ძალოვნების მიერ ლიკვიდირებული ჯგუფი დამოუკიდებლად არ მოქმედებდა.

როგორც მან „ნიუსპრესს“ განუცხადა, მომხდარის დეტალების დაზუსტებას ის ამჟამად ცდილობს.

„ბევრი რამ ძალიან საეჭვოა. ოფიციალური ვერსიით, კბილებამდე შეიარაღებულ ადამიანთა ჯგუფი დაღესტნიდან შემოვიდა და ლაფანყურის მიდამოების გავლით ისევ დაღესტნისკენ ბრუნდებოდა. ორი ვერსიაა - პირველი, რომ მათი გადაადგილება ხელისუფლების ხელშეწყობით ხდებოდა და მეორე - თუ ასე არ იყო დავღუპულვართ, რადგან თუკი ამდენი შეიარაღებული პირი ასე თავისუფლად გადაადგილდება ქვეყანაში, არავითარი უსაფრთხოების სისტემა არ გვქონია“- განაცხადა არეშიძემ და დასძინა, რომ საქართველო ძალიან რთულ რეგიონში მდებარეობს, ხოლო ხელისუფლების განცხადებები იმასთან დაკავშირებით, რომ ქვეყნის უსაფრთხოება დაცულია, სინამდვილეს არ შეესაბამება.

არეშიძე მიიჩნევს, რომ მომხდარის შეფასება აუცილებელია.

„თუ დადგინდა, რომ ამ ყველაფერში ხელისუფლების წარმომადგენლები არიან ჩართულები, ამას შესაბამისი შეფასება უნდა მიეცეს და ასეც მოხდება“-განაცხადა მან.

რაც შეეხება მედიაში გავრცელებულ ინფორმაციას კავკასიის მხრიდან მოსალოდნელი შურისძიების შესახებ, არეშიძე აცხადებს, მთავარი არა შურისძიების თემა, არამედ ქვეყნის უსაფრთხოების მდგომარეობაა.