საარჩევნო ბლოკმა „ბიძინა ივანიშვილი - ქართული ოცნება“ 29 სექტემბერს თავისუფლების მოედანზე მანიფესტაციის გამართვისთვის თბილისის მერიისგან თანხმობა მიიღო.

როგორც თბილისის მერიის განცხადებაშია ნათქვამი, 29 სექტემბერს თავისუფლების მოედანზე მანიფესტაციის გამართვის მოთხოვნით, ბლოკმა „ქართულმა ოცნებამ“ 21 აგვისტოს მიმართა.

განცხადების თანახმად, შპს „ქართულმა ოცნებამ“ 30 აგვისტოს ასევე, თავისუფლების მოედანზე 23 სექტემბრისთვის ბერა ივანიშვილის სოლო კონცერტის გამართვის მოთხოვნით განცხადება შეიტანა.

„29 სექტემბერს, თავისუფლების მოედანზე პოლიტიკური აქციის - მანიფესტაციის ჩატარებისთვის საარჩევნო ბლოკს „ბიძინა ივანიშვილი - ქართული ოცნებას“ მერიის მიერ „შეკრებებისა და მანიფესტაციების შესახებ საქართველოს კანონის“ შესაბამისად, თანხმობა მიეცა“ - ნათქვამია განცხადებაში.

რაც შეეხება შპს „ქართულ ოცნებას“, რომლის მოთხოვნაც ბერა ივანიშვილის კონცერტის გამართვა იყო, მერიის წარმომადგენლების თქმით, მათ მერიის მხრიდან წერილობით განემარტათ, რომ აღნიშნული ღონისძიების ჩატარება თავისუფლების მოედანზე მიზანშეუწონელია.

„მოცემული ღონისძიება ტრანსპორტის მოძრაობის მნიშვნელოვან შეფერხებას გამოიწვევს და მოქალაქეთა თავისუფალ გადაადგილებას ხელს შეუშლის. ამასთან, შპს „ქართულ ოცნებას“ კონცერტის ჩასატარებლად ნებისმიერი ისეთი ადგილი შეუძლია გამოიყენოს, სადაც კონცერტის გამართვით ტრანსპორტის მოძრაობა არ შეიზღუდება“ - აცხადებენ მერიაში.

მათივე თქმით, ბერა ივანიშვილს სოლო კონცერტის გასამართად შეუძლია ვაკის პარკის ან იპოდრომის ტერიტორია გამოიყენოს.