პოლიტოლოგი, ექსპერტი სოსო ცინცაძე მიიჩნევს, რომ ბლოკ „ბიძინა ივანიშვილი-ქართული ოცნების“ საარჩევნო სიის პირველ ნომრად საქართველოს ეროვნული ნაკრების ყოფილი კაპიტნის  კახა კალაძის დასახელება ივანიშვილის მხრიდან ტაქტიკური ნაბიჯი იყო.

ამის შესახებ ცინცაძემ „ნიუსპრესს“ განუცხადა.

„ივანიშვილმა პირველ ნომრად შეგნებულად არ დაასახელა კოალიციაში შემავალი პარტიების რომელიმე ლიდერი, რათა მათ შორის უკმაყოფილება არ ყოფილიყო. კალაძე კომპრომისული ფიგურაა, რომელიც არც ერთ პარტიას არ წარმოადგენს. ამიტომ, ეს სწორი გადაწყვეტილებაა“-განაცხადა ცინცაძემ.

მიუხედავად ამისა, ექსპერტი მიიჩნევს, რომ მოცემულ პოლიტიკურ სიტუაციაში საარჩევნო სიის შემადგენლობას გადამწყვეტი მნიშვნელობა აღარც აქვს.

„ყველამ კარგად იცის, რომ ფაქტობრივად, „ქართული ოცნების“ სიის პირველი ნომერი ბიძინა ივანიშვილია, „ერთიანი ნაციონალური მოძრაობის“ კი - მიხეილ სააკაშვილი. ამიტომ, ვინ იქნება პირველ ნომრად - კალაძე, უსუფაშვილი თუ შარტავა, გადამწყვეტი მნიშვნელობა აღარ აქვს“-აღნიშნა მან.

საარჩევნო ბლოკ „ბიძინა ივანიშვილი - ქართული ოცნების“ პარტიული საარჩევნო სიის პრეზენტაცია დღეს გაიმართა.

სიის პირველი ნომერი „ქართული ოცნების“ სამტრედიის მაჟორიტარი დეპუტატობის კანდიდატი კახა კალაძე, მეორე - პარტია „ქართული ოცნება - დემოკრატიული საქართველოს“ თავმჯდომარე მანანა კობახიძეა. სიის ათეულში შედიან ირაკლი ალასანია, დავით უსუფაშვილი, გოგი თოფაძე, გუბაზ სანიკიძე, ზვიად ძიძიგური, ივანე კიღურაძე, დავით საგანელიძე და ირაკლი ღარიბაშვილი.

სიაში სულ 200 წარმომადგენელი შედის.