საარჩევნო ბლოკ „ბიძინა ივანიშვილი - ქართული ოცნების“ პარტიულ საარჩევნო სიაში 200 წარმომადგენელი შედის.

როგორც სიის წარდგენისას ბიძინა ივანიშვილმა განმარტა, სიაში რიგითობა ძირითადად, ბლოკში შემავალი პარტიების ხელმძღვანელებით განისაზღვრა.

მისი თქმით, სიის პირველი ნომერი „ქართული ოცნების“ სამტრედიის მაჟორიტარი დეპუტატობის კანდიდატი კახა კალაძე, მეორე - პარტია „ქართული ოცნება - დემოკრატიული საქართველოს“ თავმჯდომარე მანანა კობახიძეა.

სიის ათეულში მანანა კობახიძეს ირაკლი ალასანია, დავით უსუფაშვილი, გოგი თოფაძე, გუბაზ სანიკიძე, ზვიად ძიძიგური, ივანე კიღურაძე, დავით საგანელიძე და ირაკლი ღარიბაშვილი მოყვებიან.

ივანიშვილის განცხადებით, სიაში მე-11 ნომრად კობა დავითაშვილი, მე-12 - გია ჟორჟოლიანი და მე-13 გიორგი გაჩეჩილაძე არიან.

„ასეთ რიგითობას ვთავაზობდით „ქართული დასის“ ლიდერს ჯონდი ბაღათურიას, თუმცა, ბოლო მომენტში რაღაცამ აცდუნა და ჩვენთან მოლაპარაკება შეწყვიტა“ - განაცხადა ივანიშვილმა.

მისივე თქმით, სიაში 61-ე ნომრამდე მაჟორიტარი დეპუტატობის კანდიდატები შედიან. 61-ე ნომერი კი, ივანიშვილის კურსელი თამაზ მეჭიაურია.

ბლოკის ლიდერი აცხადებს, რომ სიას ვახტანგ ხმალაძე ამთავრებს.

მისივე თქმით, სიის მე-200 ნომერი იმდენადაა დარწმუნებული დიდუბეში მაჟორიტარად გამარჯვებაში, რომ სიაში ბოლო ადგილი თავად მოისურვა.