პარტია „თავისუფალი საქართველოს“ ხარაგაულის მაჟორიტარი დეპუტატობის კანდიდატი გია ყრუაშვილი „ნაციონალურ მოძრაობას“ საარჩევნო აგიტაციისთვის ჩინელების გამოყენებაში ადანაშაულებს.

როგორც გია ყრუაშვილმა აღნიშნა, ხარაგაულში, მოლითი - მარელისის გზის მონაკვეთის სარეაბილიტაციო სამუშაოებზე ჩინელები არიან დასაქმებული, რომლებიც „მე მიყვარს საქართველოს“ მაისურებით მუშაობენ.

მისი თქმით, ხარაგაულში ჩინელების ნაწილს ქართული სახელები და გვარები აქვს, საქართველოს მოქალაქეები არიან და შესაბამისად, არჩევნებში მონაწილეობის უფლებით სარგებლობენ.

„ჩინელების შემოსვლა და დამკვიდრება საქართველოში განსაკუთრებით აქტიურ ფაზაში საარჩევნო წელს შევიდა. ხდება ჩინელების მასიურად ქართულ გვარებზე ჩაწერა, დასაქმება სხვადასხვა ობიექტებზე და მათთვის იმ პრივილეგიების მინიჭება, რითაც ხშირ შემთხვევაში ქართველები ვერ სარგებლობენ“- განაცხადა ყრუაშვილმა.

მისი თქმით, ამის სანაცვლოდ, ხელისუფლების მხრიდან მათი „ნაციონალური მოძრაობის“ საარჩევნო აგიტაციაში ჩართვა ხდება.

ყრუაშვილის განცხადებით, ხელისუფლებას ქართველ ხალხში დასაყრდენი აღარ დარჩა და იმედებს უცხოეთიდან შემოსულ ემიგრანტებზე ამყარებს.
„თავისუფალი საქართველოს“ მონაცემებით, ბოლო წლებში საქართველოში საცხოვრებლად, ჩინეთის დაახლოებით, 40 000 მოქალაქე ჩამოვიდა.