„ქრისტიან-დემოკრატიული მოძრაობის“ საერთაშორისო მდივანი გიორგი რუხაძე ამერიკელი რესპუბლიკელების ერთ–ერთ ლიდერს სენატორ ნორმ კოლმანს შეხვდა.

როგორც „ნიუსპრესს“ „ქრისტიან-დემოკრატებიდან“ აცნობეს, შეხვედრა ქალაქ ტამპაში ამერიკის რესპუბლიკური პარტიის ყრილობისა და დემოკრატიული კავშირის აღმასრულებელთა საბჭოს ფარგლებში შედგა.

შეხვედრის მთავარი თემები საქართველოში მიმდინარე პოლიტიკური მოვლენები, მომავალი საპარლამენტო არჩევნები და კავკასიის რეგიონში ამერიკელი რესპუბლიკელების საგარეო პოლიტიკური გეგმები იყო.

რუხაძემ სენატორს საქართველოს სუვერენიტეტისა და ტერიტორიული მთლიანობის აქტიური მხარდაჭერისთვის მადლობა გადაუხადა. სენატორმა კოლმანმა კი, თავის მხრივ საქართველოს საპარლამენეტო არჩევნების სამართლიან და კონკურენტულ გარემოში ჩატარების აუცილებლობას გაუსვა ხაზი.

„დარწმუნებული ვარ, რომ არჩევნები საქართველოში სამართლიანი და დემოკრატიული იქნება და ამით თქვენი ქვეყანა მნიშვნელოვან ნაბიჯს გადადგამს დემოკრატიის კონსოლიდაციისკენ“ – განაცხადა კოლმანმა.

ქდმ–ს ცნობით, საერთაშორისო მდივანი გიორგი რუხაძე ფლორიდაში რესპუბლიკური პარტიის ყრილობასა და საერთაშორისო დემოკრატიული კავშირის აღმასრულებელთა შეხვედრას ესწრება.

ღონისძიებაში 50 შტატის 18 ათასი დელეგატი და ასობით ამერიკელი და უცხოელი პოლიტიკური ლიდერი მონაწილეობს. ყრილობა დღეს ოფიციალურად აირჩევს რესპუბლიკური პარტიის საპრეზიდენტო კანდიდატს მიტ რომნის, რომელიც ნოემბრის არჩევნებში ბარაკ ობამას დაუპირისპირდება.