საარჩევნო ბლოკ „ბიძინა ივანიშვილი-ქართული ოცნების“ ლიდერი მიიჩნევს, რომ საქართველოს ტერიტორიები ხელისუფლებამ საკუთარი სავარძლის გაძლიერების მიზეზით დაკარგა.

მისი თქმით, პრეზიდენტი მიხეილ სააკაშვილი გაყალბებული არჩევნების შემდეგ, თავის სისუსტეს გრძნობდა და სავარძლის შესანარჩუნებლად, ათასგვარი სისულელე გააკეთა.

„ხელისუფლება ყველაფერზე წამსვლელია. ამის გამო მოხდა ის, რომ დაკარგა ტერიტორიები. სააკაშვილს ძალიან სუსტი სავარძელი ჰქონდა და გაყალბებული არჩევნების შემდეგ, თავს სუსტად გრძნობდა. ზუსტად ეს იყო იმის მიზეზი, რომ სავარძელი გაემაგრებინა, მაგრამ ხელისუფლებას ჭკუა და ანალიზის უნარი არ ეყო, ცრუ ინფორმაციას აყვა და ათასგვარი სისულელე გააკეთა“ - განაცხადა მან.

ივანიშვილის თქმით, იმ ფაქტს, რომ ხელისუფლება ყველაფერზე წამსვლელია „დემოკრატიული მოძრაობა - ერთიანი საქართველოს“ ლიდერის ნინო ბურჯანაძის შემთხვევაც ადასტურებს.

როგორც კოალიციის ლიდერმა აღნიშნა, ბურჯანაძის მიერ მიწოდებული ინფორმაცია, რომ მას ხელისუფლებიდან წასვლის შემთხვევაში აფხაზეთთან ომის დაწყებით ემუქრებოდნენ, დამაჯერებელია.

„ჩემთვის შოკის მომგვრელი იყო ის ინფორმაცია, რაც ბურჯანაძემ მომაწოდა. ასევე, ომის დაწყებამდე ბოკერია მე შევაჩერე. მათ გაცილებით ადრე სურდათ იმ ოპერაციის დაწყება, რაც მოხდა სამხრეთ ოსეთთან დაკავშირებით. ეს ყველაფერი იმაზე მიუთითებს, რომ ხელისუფლება ყველაფერზე წამსვლელია. რაც შეეხება ბურჯანაძის ინფორმაციას, შესაძლოა, კითხვები გაჩნდეს, მაგრამ მთლიანი სურათი იკვრება, რაც დამაჯერებელია. პირადად მე, დავიჯერე“ - აღნიშნა ივანიშვილმა.