საქართველოში ჩეჩნური დიასპორის წარმომადგენელი მექა ხანგოშვილი „ნიუსპრესთან“ საუბარში აცხადებს,  რომ ლოპოტას ხეობის სპეცოპერაცია დაღესტნიდან გადმოსული შეიარაღებული ჯგუფის წინააღმდეგ, კავკასიელი ხალხებისა და ქართველების ურთიერთობაში რაიმე სახის დაძაბულობის საბაბი არ უნდა გახდეს.

დღეს ინტერნეტსივრცეში გავრცელდა დაღესტნის მოჯაჰედების ვილაიეთის ხელმძღვანელობის განცხადება, რომელშიც აღნიშნულია, რომ ლოპოტას ხეობაში ქართულმა მხარემ „მოღალატეობრივად მოუწყო“ „იმარატ კავკაზის“ მოჯაჰედებს და თუ სპეცოპერაცია არ შეწყდება, შურისძიება დაიწყება.

როგორც ხანგოშვილმა აღნიშნა, ქართველებსა და დანარჩენ კავკასიელებს შორის ურთიერთობა არ უნდა დაიძაბოს.

„ამ ურთიერთობას ისეთი დიდი ისტორია აქვს, რომ არ შეიძლება ასეთ პატარა ინციდენტებს შეეწიროს. იმედია, რომ ურთიერთობა არ დაიძაბება. მართალია ღალატის შემთხვევაში, მათ პატიების უნარი ნაკლებად აქვთ და არც თვითონ ღალატობენ, მაგრამ დიდი იმედი მაქვს, რომ კეთილგონიერება გაიმარჯვებს და არანაირი სახალხო შურისძიება არ მოხდება“ - განუცხადა ხანგოშვილმა „ნიუსპრესს“.

მან ასევე აღნიშნა, რომ არსებობს უხუცესთა საბჭო, რომლის გადაწყვეტილებებსაც ახალგაზრდები ემორჩილებიან.

ამასთანავე, მისი თქმით, ტერორიზმს ეროვნება არ გააჩნია და არც ტერორისტების მოქმედებას აქვს გამართლება.

„კავკასიაში მსგავსი რამ მაინც ნაკლებად არის. მე ძალიან დიდი იმედი და სურვილი მაქვს, რომ კავკასიელი ხალხის წინააღმდეგ მსგავსი შურისძიება არ განხორციელდება. ჩვენი შესაძლებლობების ფარგლებში ყველაფერი გაკეთდება, რომ ეს ურთიერთიობა არ დაიძაბოს“ - განაცხადა მექა ხანგოშვილმა.

ამასთანავე, მან დასძინა, რომ პანკისის ხეობაში, რომელიც ეთნიკური ჩეჩნებით - ქისტებით არის დასახლებული, სრული სიმშვიდეა და არანაირი დაძაბულობა არ შეინიშნება.

ლოპოტას ხეობაში შეიარაღებული ჯგუფის წინააღმდეგ სპეცოპერაცია გრძელდება. გუშინ საქართველოს შსს-მ გაავრცელა ინფორმაცია მძევლების გათავისუფლებისა და 11 დივერსანტის ლიკვიდაციის შესახებ. ოპერაცია ამ დრომდე გრძელდება.