ელჩების კონფერენციის ფარგლებში შეხვედრა - " დიასპორასთან ურთიერთობა და საზღვარგარეთ საქართველოს მოქალაქეების უფლებების უზრუნველყოფა" გაიმართა.

სესიაზე სიტყვით გამოვიდნენ საგარეო საქმეთა მინისტრის მოადგილეები ხათუნა თოთლაძე და მიხეილ ნინუა, ასევე საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე, თეა ახვლედიანი.

ღონისძიების მონაწილეებმა დიასპორასთან ურთიერთობის საკითხებზე ისჯელეს. საქართველოს დიპლომატიური წარმომადგენლობების ხელმძღვანელებმა და საგარეო საქმეთა სამინისტროს ცენტრალური აპარატის წარმომადგენლებმა შეაჯამეს დიასპორასთან ურთიერთობის კუთხით 2019 წელს განხორციელებული საქმიანობა და ყურადღება გაამახვილეს სამომავლო გეგმებზე, ასევე, ხაზი გაესვა იმ გამოწვევებს, რომლებსაც საზღვარგარეთ ქართული დიასპორის წევრები აწყდებიან და მათი გადაწყვეტის საკითხებს.

სესიაზე საქართველოს დიპლომატიურ კორპუსს გააცნეს ქართული დიასპორისთვის შექმნილი ვებ-გვერდი, სადაც წარმოდგენილია ინფორმაცია სახელმწიფო სერვისების, პროექტებისა და დიასპორული ორგანიზაციების შესახებ.

ქართველმა დიპლომატებმა სესიაზე ასევე იმსჯელეს საზღვარგარეთ საქართველოს მოქალაქეების მომსახურების საკითხებზე და ყურადღება გაამახვილეს იმ ახალ სერვისებზე, რომლის დანერგვაც ახლო მომავალში იგეგმება. შეხვედრის ფარგლებში შეფასდა 2019 წლის შედეგები საკონსულო საქმიანობის ყველა მიმართულებით. განხილულ იქნა სამომავლო გეგმები საქართველოს მოქალაქეთა უფლებებისა და კანონიერი ინტერესების დაცვის გაუმჯობესების მიზნით.

საგარეო საქმეთა მინისტრის მოადგილის, ხათუნა თოთლაძის განცხადებით, საგარეო უწყების ერთ-ერთ მთავარ მიზანს წარმოადგენს საზღვარგარეთ საქართველოს მოქალაქეებისთვის კიდევ უფრო ხელმისაწვდომი გახდეს ის მომსახურებები, რომელსაც სახელმწიფო მათ სთავაზობს.

პანელის მონაწილეებმა ასევე ისჯელეს ცირკულარული შრომითი მიგრაციის მნიშვნელობაზე და ამ მიმართულებით სახელმწიფოს მიერ დაგეგმილ და გადადგმულ ნაბიჯებზე.