საქართველოს პრეზიდენტი მიხეილ სააკაშვილი ბორჯომს ესტუმრა და ეკონომიკისა და მდგრადი განვითარების მინისტრ ვერა ქობალიასთან ერთად სარეაბილიტაციო სამუშაოებს გაეცნო.

მიხეილ სააკაშვილმა ახალი ხიდი, კაფე-ბარი და მშენებარე რესტორნები და სასტუმროები დაათვალიერა.

როგორც პრეზიდენტმა აღნიშნა, ახალი ხიდი გარემოს დაცვის მინისტრის გოგა ხაჩიძის შემოქმედებაა.

„შესაძლოა, ვინმემ თქვას, რომ ხიდის ხატვა მინისტრის საქმე არ არის, მაგრამ ხიდიც უნდა ხატოს და საქმეც უნდა აკეთოს. ახლა, ახალი სალაპარაკო გაუჩნდებათ და სასწრაფოდ გააკრიტიკებენ. ახალი ხიდი გარემოს ძალიან უხდება“ - განაცხადა სააკაშვილმა.

მისივე თქმით, ახალი გზით საირმეში, საირმედან კი - ვანისა და სამტრედიის ბალნეოლოგიურ კურორტებზე გადასვლაა შესაძლებელი.

პრეზიდენტის შეფასებით, იმის გათვალისწინებით, რაც ქვეყანაში კეთდება, კურორტების რკალი იკვრება.

„ბორჯომი ადრე ჩამკვდარი იყო, მაგრამ ეს ქალაქი აღდგა. აქ არც ერთი ნომრალური სასტუმრო აღარ იყო. ეს ინფრასტრუქტურა საშუალებას აძლევს ტურისტებს აღნიშნული კურორტით მთელი წლის განმავლობაში ისარგებლონ და ხალხს შემოსავალი ჰქონდეს. ამაში მათ ქუთაისის აეროპორტიც დაეხმარება, რადგან ქუთაისისა და თბილისის აეროპორტებიდან ერთი და იგივე მანძილია“ - აღნიშნა მიხეილ სააკაშვილმა.

პრეზიდენტმა ბორჯომის ქუჩებშიც გაისეირნა, რეაბილიტირებული პარკიც დაათვალიერა და მიმდინარე სამუშაოებით დაინტერესდა.

მიხეილ სააკაშვილმა მოსახლეობასთან საუბრისას, ყურადღება კურორტის ახალ შესაძლებლობებზე გაამახვილა.

„მიხარია, რომ აქ ბევრი ხალხი ჩამოდის, რომელიც წარმომავლობით ჩვენი აფხაზეთიდანაა. მომავალ წელს კიდევ ხუთი ახალი სასტუმრო გაიხსნება. ეს ჯერ დასაწყისია. ახლა უკვე ლაზიკას მშენებლობა დავიწყეთ. სამეგრელოში ვაკეთებთ სქურსა და ლებარდეს“ - განაცხადა მიხეილ სააკაშვილმა და დასძინა, რომ ბორჯომში არცერთი მოსასვენებელი ადგილი აღარ იყო, ახლა კი, ყველაფერი კეთდება.