​2019 წლის 12 დეკემბერს საქართველოს საგარეო საქმეთა მინისტრის მოადგილემ, ჟენევის საერთაშორისო მოლაპარაკებებში საქართველოს დელეგაციის ხელმძღვანელმა, ლაშა დარსალიამ, საინფორმაციო ბრიფინგი გამართა ჟენევაში გაერო-ს განყოფილებასთან და სხვა საერთაშორისო ორგანიზაციებთან აკრედიტებული დიპლომატიური წარმომადგენლობებისთვის.



მინისტრის მოადგილემ დიპლომატიური კორპუსის წარმომადგენლებს გააცნო საქართველოს აფხაზეთისა და ცხინვალის რეგიონებში, ისევე როგორც საოკუპაციო ხაზის გასწვრივ უსაფრთხოების, ჰუმანიტარული და ადამიანის უფლებების კუთხით გამწვავებული ვითარება. მან განსაკუთრებული ყურადღება გაამახვილა ქართველი ექიმის, ვაჟა გაფრინდაშვილის, უკანონოდ დაკავების საკითხზე და ხაზი გაუსვა მისი დაუყოვნებლივ გათავისუფლების აუცილებლობას.



ლაშა დარსალიამ საერთაშორისო პარტნიორებს ინფორმაცია მიაწოდა ბოლო პერიოდში ადგილზე გახშირებული პროვოკაციების შესახებ, მათ შორის, სოფელ ჩორჩანასთან საოკუპაციო ძალების უკანონო მოქმედებებზე, საოკუპაციო ხაზზე მავთულხლართებისა და სხვადასხვა ხელოვნური ბარიერების აღმართვაზე, ე.წ. გადასასვლელი პუნქტების დახურვისა და თავისუფალი გადაადგილების შეზღუდვის მძიმე შედეგებზე ადგილობრივი მოსახლეობისთვის. მან ყურადღება გაამახვილა ოკუპირებულ ტერიტორიებზე დარჩენილი ქართველების ეთნიკურ დისკრიმინაციასა და მშობლიურ ენაზე განათლების აკრძალვის საკითხზე. გამწვავებული ვითარების დეესკალაციისა და კონფლიქტის მშვიდობიანი დარეგულირების კონტექსტში, მინისტრის მოადგილემ ხაზგასმით აღნიშნა რუსეთის მიერ ევროკავშირის შუამავლობით 2008 წლის 12 აგვისტოს დადებული ცეცხლის შეწყვეტის შეთანხმების სრულად შესრულების აუცილებლობა.



ლაშა დარსალიამ ვრცლად ისაუბრა საქართველოს სამშვიდობო პოლიტიკის შესახებ. მან ხაზი გაუსვა ჟენევის საერთაშორისო მოლაპარაკებების მნიშვნელობას, როგორც საქართველოსა და რუსეთს შორის სამშვიდობო მოლაპარაკებების ერთადერთ ფორმატს, სადაც ევროკავშირის, გაეროს, ეუთოს შუამავლობითა და აშშ-ის მონაწილეობით განიხილება საქართველოს ორი რეგიონის უკანონო ოკუპაციასთან დაკავშირებული უსაფრთხოებისა და ჰუმანიტარული გამოწვევები. მინისტრის მოადგილემ ისაუბრა მოლაპარაკებების მიმდინარეობაზე განვლილი 50 რაუნდის განმავლობაში.



ლაშა დარსალიამ ყურადღება გაამახვილა ასევე მთავრობის ძალისხმევაზე ომითა და საოკუპაციო ხაზებით გაყოფილ მოსახლეობას შორის შერიგებისა და ნდობის აღდგენის მიმართულებით.



შეხვედრის ფარგლებში მხარდამჭერი განცხადებები გააკეთეს გააკეთეს: ლატვიის, ლიეტუვის, აზერბაიჯანის, ფინეთის, პოლონეთის, მონტენეგროს, იტალიისა და უკრაინის მუდმივმა წარმომადგენლებმა. მათ ხაზი გაუსვეს ადგილზე არსებული რთული ვითარების მონიტორინგის მნიშვნელობას და ამ მიმართულებით ოკუპირებულ ტერიტორიებზე შეღწევადობის აუცილებლობას.



შეხვედრის ბოლოს მინისტრის მოადგილემ მადლობა გადაუხადა საერთაშორისო პარტნიორებს საქართველოს სუვერენიტეტისა და ტერიტორიული მთლიანობის მტკიცე მხარდაჭერისთვის და აღნიშნა, რომ ძალზე მნიშვნელოვანია, საქართველოს ოკუპირებულ რეგიონებთან დაკავშირებული საკითხები მუდმივად იყოს საერთაშორისო თანამეგობრობის დღის წესრიგში.