პარლამენტის ვიცე-სპიკერმა მამუკა მდინარაძემ ჟურნალისტებთან განცხადება პარლამენტში მიმდინარე გუშინდელი მოვლენების შესახებ დღეს კიდევ ერთხელ გააკეთა.

მდინარაძის თქმით, მსგავსი იაფფასიანი და მდაბიო საქციელით ბოკერიას ფრთა და ,,ნაციონალური მოძრაობა’’ დამთავრდა.

,,სუნზე კი არ არის საუბარი, ქიმიურ ხსნარზეა საუბარი, რომელმაც იმ ადამიანებისთვის, რომელთაც აღმოაჩნდათ ალერგიული ფონი, გამოიწვია რისკი. გუშინ ამ მდაბიოობით, ბოკერიას ფრთა და მთლიანად ,,ნაციონალური მოძრაობა’’ დამთავრდა. ეს იყო მდაბიო, მარტივი, იაფფასიანი და უხარისხო პერფორმანსი’’ - განაცხადა მამუკა მდინარაძემ.
12 დეკემბერს პარლამენტის პლენარულ სხდომაზე, კენჭისყრის დაწყებამდე რამდენიმე წუთით ადრე, პროცესის ჩასაშლელად, დარბაზში გაურკვეველი ნივთიერება გაუშვეს, ამის შედეგად რამდენიმე ადამიანი ცუდად გახდა. ამ მიზეზით დეპუტატებს სხდომათა დარბაზი დაატოვებინეს და კენჭისყრა რამდენიმე საათით გადაიდო.