პოლიტიკურმა პარტიამ „თავისუფალი საქართველო“ ოზურგეთის რაიონში გურიის რეგიონის მაჟორიტარი დეპუტატობის კანდიდატები წარადგინა.

როგორც „ნიუსპრესს“ პარტიის პრესსამსახურიდან აცნობეს, ოზურგეთში დეპუტატობის კანდიდატად კახა ბურჯალიანი დასახელდა, ლანჩხუთში - მინდია კეჭაყმაძე, ჩოხატაურში - გუბაზ მეგრელიძე.

მაჟორიტარობის კანდიდატების წარდგენის პარალელურად, პარტიულ აქტივთან შეხვედრა გაიმართა, სადაც „თავისუფალი საქართველოს“ თავმჯდომარემ კახა კუკავამ პარტიის პროგრამის პრიორიტეტებზე ისაუბრა. მან ყურდღება გაამახვილა ქვეყანაში წინასაარჩევნოდ შექმნილ პოლიტიკურ ვითარებაზე და აღნიშნა, რომ ხელისუფლება ყველა მეთოდს მიმართავს არჩევნებზე სასურველი შედეგის მისაღწევად.

კუკავამ გამოსვლისას კიდევ ერთხელ გაუსვა ხაზი, რომ პარტია მზადაა რეალურ ოპოზიციასთან ერთიანი მაჟორიტარობის კანდიდატებზე შეთანხმებისთვის.