პარლამენტის თავმჯდომარე არჩილ თალაკვაძემ ევროპის საბჭოს გენერალურ მდივანს,მარია
პეიჩინოვიჩ ბურიჩს უმასპინძლა, რომელიც საქართველოში ოფიციალური ვიზიტით იმყოფება.

პარლამენტის პრესსამსახურის ინფორმაციით, მხარეებმა საქართველოსა და ევროპის საბჭოს შორის არსებულ თანამშრომლობაზე ისაუბრეს და საქართველოსთვის ევროპის საბჭოს მიერ შემუშავებული 2020-2023 წლების სამოქმედო გეგმა განიხილეს.

საუბარი ჩვენი ქვეყნის ოკუპირებულ ტერიტორიებზე შექმნილი მდგომარეობის შესახებ ანგარიშსაც შეეხო, რომელზეც დისკუსია 13 ნოემბერს, ევროპის საბჭოს მინისტრთა კომიტეტის სხდომაზე გაიმართება.

ყურადღება გამახვილდა საქართველოს ოკუპირებულ რეგიონებში შექმნილ ვითარებასა და რუსეთის ფედერაციის პროვოკაციულ ქმედებებზე. პარლამენტის თავმჯდომარემ სტუმარს საქართველოს მთავრობის სამშვიდობო ინიციატივები გააცნო.

არჩილ თალაკვაძემ მარია პეიჩინოვიჩ ბურიჩს საქართველოში მიმდინარე დემოკრატიული რეფორმებისა და პარლამენტის დღის წესრიგის შესახებ ინფორმაცია მიაწოდა.

მხარეებმა ასევე იმსჯელეს ევროპის საბჭოს მინისტრთა კომიტეტის თავმჯდომარეობაზე, რომელსაც ჩვენი ქვეყანა 27 ნოემბერს გადაიბარებს და იმ პრიორიტეტულ მიმართულებებზე, რომლებზეც საქართველო თავმჯდომარეობის პერიოდში იმუშავებს.

პარლამენტის თავმჯდომარემ გენერალურ მდივანს კიდევ ერთხელ დაუდასტურა, რომ საქართველო დემოკრატიის, ადამიანის უფლებებისა და კანონის უზენაესობის პრინციპების ერთგულია და საქართველოს მიერ ევროპის საბჭოს თავმჯდომარეობის პერიოდში, შემდგომი თანამშრომლობისთვის მზადყოფნა გამოთქვა.

ევროპის საბჭოს გენერალურმა მდივანმა, მარია პეიჩინოვიჩ ბურიჩმა ხაზი გაუსვა საქართველოს წარმატებებს დემოკრატიული რეფორმების, კანონის უზენაესობისა და ადამიანის უფლებების დაცვის სფეროში. მან საქართველოს სუვერენიტეტისა და ტერიტორიული მთლიანობის პრინციპების მიმართ მხარდაჭერა გამოხატა .