პარტია „ქართული ოცნება - დემოკრატიული საქართველოს“ აღმასრულებელ მდივანს ნოდარ ხადურს სახელმწიფო აუდიტის სამსახურმა ახსნა-განმარტება ჩამოართვა.

როგორც „ნიუსპრესს“ ხადურმა განუცხადა, აუდიტის სამსახურში მის მიერ 1 კვირის წინ პარტიისადმი განხორციელებული შემოწირულობით დაინტერესდნენ, ხოლო მის შემოსავლებთან დაკავშირებით ბევრი შეკითხვა არ დასმულა.

„ახსნა-განმარტება ჩამომართვეს ჩემს მიერ განხორციელებულ შემოწირულობებთან დაკავშირებით. ნათია მოგელაძე უფრო მეტად ჩაუღრმავდა და პირადად დაინტერესდა ჩემს მიერ 1 კვირის წინ განხორციელებული ტრანზაქციით, როდესაც მე 330,40 ლარი გადავიხადე საბაჟო მოსაკრებელზე და მომსახურების სახით შევწირე პარტის“- განუცხადა „ნიუსპრესს“ ხადურმა და დასძინა, რომ მის დაკითხვაში გარკვეული დროის განმავლობაში, პოლიტიკური პარტიების ფინანსური მონიტორინგის სამსახურის უფროსი ნათია მოგელაძეც მონაწილეობდა.

ხადურის თქმით, აუდიტის სამსახურში განუცხადეს, რომ დაკითხვის ძირითადი მიზანი შემდგომი დარღვევების პრევენცია იყო.

„ისინი მიიჩნევენ, რომ ჩემს მიერ გასულ კვირას განხორციელებული შემოწირულობით, შევეცადეთ კანონისთვის გვერდი აგვევლო, თუმცა ავუხსენით, რომ იმ დღეს ინკასო ედო პარტიის ანგარიშს და შესაბამისად, ჩვენ სხვაგვარად ვერ ვიმოქმედებდით. მოგელაძემ აღნიშნა, რომ ის გადაამოწმებს ამ ინფორმაციას აღსრულების ეროვნულ სამსახურში. ვფიქრობ, აუდიტის სამსახური დარწმუნდა იმაშიც, რომ ჩემი შემოსავლები საკმარისი იყო“ - აღნიშნა ხადურმა.

კოალიცია „ქართული ოცნების“ ბრენდირებული მაისურების შემოსატანად საბაჟო მოსაკრებლის გადასახადი - 330 ნოდარ ხადურმა საკუთარი სახელფასო ანგარიშიდან 17 აგვისტოს გამოიტანა.

მისი განმარტებით, კოალიციაში შემავალი სუბიექტების ანგარიშზე ინკასოს დადების გამო თანხა ჩამოჭრილი იყო, ბრენდირებული მაისურების საბაჟო მოსაკრებელს კი „ქართული ოცნება“ საკუთარი ანგარიშიდან ვერ გადაიხდიდა.