კოალიციამ, რომელშიც „თავისუფალი საქართველო“, „ტრადიციონალისტთა კავშირი“ და „თეთრები“ შედიან დედაქალაქის 5 საარჩევნო ოლქში  მაჟორიტარობის კანდიდატები წარადგინა.

როგორც დღეს გამართულ პრესკონფერენციაზე პარტია „თავისუფალი საქართველოს“ ლიდერმა კახა კუკავამ განაცხადა, კრწანისის რაიონში კენჭს იყრის „ტრადიციონალისტთა“ ლიდერი აკაკი ასათიანი, ისნის რაიონში მაჟორიტარი კანდიდატი იქნება ყოფილი ფეხბურთელი გელა კეტაშვილი, სამგორის რაიონში მაჟორიტარ კანდიდატად დასახელდა „თავისუფალი საქართველოს“ გენერალური მდივანი ალექსანდრე შალამბერიძე, ხოლო დიდუბის რაიონში კენჭს საქართველოს პარლამენტის წევრი დიმიტრი ლორთქიფანიძე იყრის. რაც შეეხება ვაკის რაიონს, მაჟორიტარი დეპუტატის მანდატის მოსაპოვებლად პარტიის ლიდერი კახა კუკავა იბრძოლებს.

როგორც კუკავამ განაცხადა, აუცილებელია, რომ ოპოზიციამ დაიწყოს კოორდინაცია ერთიან მაჟორიტარ კანდიდატებთან დაკავშირებით, რათა ოპოზიციის კანდიდატებს შორის ხმები არ გაიყოს, ამით კი, ხელისუფლება ისარგებლებს.

„გამოვთქვამთ მზადყოფნას, შევთანხმდეთ ერთიან კანდიდატებზე ყველა საარჩევნო ოლქში და ვდგამთ პირველ ნაბიჯს - მთაწმინდის საარჩევნო ოლქში არ ვაყენებთ მაჟორიტარ კანდიდატს და მხარდაჭერას ვუცხადებთ „ქართული ოცნების“ წარმომადგენელს ზაზა პაპუაშვილს. ამასთან, მზად ვართ, რომ ამ საკითხზე შევხვდეთ კოალიციის ლიდერს ბიძინა ივანიშვილს და აღნიშნულთან დაკავშირებით პრაიმერი ან სოციოლოგიური გამოკითხვა ჩავატაროთ“ - განაცხადა კუკავამ.

მისივე თქმით, საქართველოს ხელისუფლების მიერ გადადგმული ნაბიჯები ცხადყოფს, რომ ის არჩევნების ტოტალური გაყალბებისთვის ემზადება. მისი განცხადებით, არჩევნების გაყალბების შემთხვევაში, პარტია „თავისუფალი საქართველო“ მზადაა, მოქალაქეების ხმები ქუჩის აქციებით და სხვა რადიკალური მეთოდებით დაიცვას.