საქართველოს პრეზიდენტმა მიხეილ სააკაშვილმა ხონის რაიონის სოფელ გორდში საქართველოს კურორტებისა და ქვეყანაში ტურიზმის განვითარების მნიშვნელობაზე ისაუბრა.

როგორც პრეზიდენტმა აღნიშნა, მისი ხელისუფლების დროს საქართველოში ბევრი ისეთი ტურისტული და საკურორტო ზონა გაჩნდა, რომელიც საბჭოთა დროს ყურადღების მიღმა იყო დარჩენილი.

„მაგალითად, საბჭოთა კავშირის დროს გორდის კანიონი ან ბევრი ის ადგილი, რომელიც ჩვენ გავაკეთეთ, არ არსებობდა? არსებობდა, მაგრამ არ აკეთებდნენ „-აღნიშნა სააკაშვილმა და დასძინა, რომ საბჭოთა პერიოდში საქართველოში სულ რამდენიმე კურორტი იყო განვითარებული, სადაც მხოლოდ რუსი დამსვენებლები ისვენებდნენ.

მისივე თქმით, უკანასკნელ ხანებში ქვეყანაში ბევრი ტურისტული ადგილი გაჩნდა, მაგალითად, ანაკლია, მესტია, რომელიც ქართველების უმეტესობას „მოუსვლელში ეგონა“, ასევე, რაჭა და ახალციხე.

„ამდენი ადგილი აღმოვაჩინეთ საქართველოში. კი, მტერს ოკუპირებული აქვს ჩვენი ტერიტორიის ნაწილი, რომელსაც აუცილებლად დავიბრუნებთ“-აღნიშნა მან.

როგორც პრეზიდენტმა აღნიშნა, საბჭოთა კავშირის დროს ამ ტერიტორიების განვითარება იმის გამო არ ხდებოდა, რომ ამით ქართველებს საკუთარ თავზე დიდი წარმოდგენა არ შექმნოდათ.

პრეზიდენტის თქმით, საქართველო ტურისტებისთვის მიმზიდველი ქვეყანა უნდა გახდეს, მათ შორის, აქ ბევრი რუსი ტურისტი უნდა ჩამოვიდეს.

„მინდა, ჩვენ გვიყურონ, როგორც წარმატებულ და არა როგორც დაპყრობილ ქვეყანას. ჩვენ რუსებთან ურთიერთობას სახალხო დიპლომატიის გზით დავიბრუნებთ. თუ ვინმეს ჰგონია, რომ გზა საქართველოს უკეთესი ცხოვრებისკენ უთავმოყვარეობაზე გადის, მან ჩვენი ისტორია არ იცის. მხოლოდ განვითარებით, ღირსებით, სიღარიბის და უმუშევრობის დაძლევით მოვიგებთ ყველას გულს, მათ შორის, იმ დამპყობლების მოსახლეობის, რომელიც საქართველოს პრობლემებს უქმნის “-აღნიშნა პრეზიდენტმა.