ჩვენი ამოცანაა, ესკალაციის ფონზე გავაკეთოთ ყველაფერი, რომ მივიღოთ ის შედეგები რაც მოქალაქეების ინტერესებისთვის არის სასიცოცხლოდ მნიშვნელოვანი,- ამის შესახებ უმრავლესობის წევრმა სოფიო ქაცარავამ, საქართველო-რუსეთის საგარეო უწყებების ხელმძღვანელთა შეხვედრის შესახებ საუბრისას განაცხადა.

"საერთაშორისო თანამეგობრობასთან ერთად, ჩვენი ამოცანაა, ესკალაციის ფონზე გავაკეთოთ ყველაფერი, რომ მივიღოთ ის შედეგები, რაც ქვეყნის და მოქალაქეების ინტერესებისთვის არის სასიცოცხლოდ მნიშვნელოვანი. აქედან გამომდინარე, საინტერესოდ იქნა მიჩნეული შვეიცარიის მხრიდან შემოთავაზება, გაეროს გენერალური ასამბლეის ფარგლებში რუსულ მხარესთან შეხვედრის შესახებ. ჩვენ არ ვაჩენთ მაღალ მოლოდინებს. როგორც ვამბობდით, ჩვენ საქართველო-რუსეთის ურთიერთობებში გვჭირდებოდა საერთაშორისო თანამეგობრობის მხარდაჭერა და ამ ნაბიჯშიც მთელი საერთაშორისო თანამეგობრობა გვიდგას მხარში. ზუსტად ამგვარი მოქმედებების შედეგია შეხვედრა რომელიც შედგა. ჩვენი ხელისუფლება პასუხისმგებლიანი და ადეკვატურია სწორედ იმ თანმიმდევრული მოქმედებების გამო, რაც ჩვენი მოქალაქეების უსაფრთხოებას ისახავს მიზნად",- განაცხადა ქაცარავამ.

შეგახსენებთ, რომ ნიუ-იორკში, საქართველოს საგარეო საქმეთა მინისტრის, დავით ზალკალიანის და რუსეთის ფედერაციის საგარეო საქმეთა მინისტრის, სერგეი ლავროვის შეხვედრა გაიმართა.