იურიდიულ საკითხთა კომიტეტში, უზენაესი სასამართლოს მოსამართლების კანდიდატის, მერაბ გაბინაშვილის კანდიდატურის განხილვისას, დეპუტატმა, ფრაქცია „ქართული ოცნების“ წევრმა ნუკრი ქანთარიამ რამდენიმე კითხვით მიმართა მას. „მე არ ვითხოვ სწორ პასუხებს, მე გთხოვთ კითხვებს გასცეთ გულწრფელი პასუხები, ვინაიდან, ვთვლი, რომ გულწრფელობა ახლა არის უმთავრესი“,- მიმართა ნუკრი ქანთარიამ მოსამართლეობის კანდიდატს.

ნუკრი ქანთარია დაინტერესდა რა მიზეზით და მოტივაციით იყო განპირობებული მერაბ გაბინაშვილის მხრიდან პროფესიის შეცვლის გადაწყვეტილება 2006 წელს, იმ რეალობის და ატმოსფეროს გათვალისწინებით, რომელიც სასამართლო სისტემაში 2006 წლისთვის არსებობდა. დეპუტატი ასევე დაინტერესდა მოსამართლეობის კანდიდატის მოსაზრებით, თუ რამდენად შეძლო მან სასამართლო სისტემაში მისვლის შემდეგ არსებული გარემო შეეცვალა.

„თქვენ 2006 წელს შემოხვედით ამ პროფესიაში. ფაქტიურად შეიცვალეთ პროფესია. 2006 წელი არის კულმინაცია იმ რეჟიმის. პირადად თქვენ, რამ გადაგაწყვეტინათ პროფესიის შეცვლა და რა იდეით მიხვედით. იმ პერიოდის სასამართლო, დუმს. ამ დროს, თქვენ იცვლით პროფესიას და შედიხართ ამ კოჰორტაში, იმიტომ, რომ თქვენი მუშაობით იყოთ სამაგალითო, შეცვალოთ რამე და თქვენი კვალი დაამჩნიოთ, თუ ეს იყო თქვენი მხრიდან სურვილი უკეთესი ხელფასის და სტაბილური მდგომარეობის?

უკვე ამ სფეროში მუშაობის განმავლობაში, თქვენ როგორ მიგაჩნიათ, რა კვალი დაამჩნიეთ, შეცვალეთ თუ არა თქვენი ობიექტურობით, პირდაპირობით, სამართლიანობით, იმ გარემოს, სადაც თქვენ დაიწყეთ მოღვაწეობა? და თუ გაქვთ რამე სინანულის გრძნობა, რომ რამე უნდა გაგეკეთებინათ, რამე გადაწყვეტილება უნდა მიგეღოთ და ვერ შეძელით რიგი გარემოებების გამო,“-მიმართა ნუკრი ქანთარიამ მერაბ გაბინაშვილს.

პარლამენტის წევრის შეკითხვა ასევე მერაბ გაბინაშვილის განაჩენების მიმართ არსებული საჩივრების რაოდენობას შეეხებოდა.