„დემოკრატიული მოძრაობა - ერთიანი საქართველოს“ ლიდერის ნინო ბურჯანაძის შეფასებით, პოლიტიკური კოალიცია „ქართული ოცნების“ მიმართ  ხელისუფლების მხრიდან განხორციელებულ „უმსგავსობებზე“ დასავლეთის დუმილი შემაშფოთებელია.

ამის შესახებ ბურჯანაძემ ტელეკომპანია „მე-9 არხთან“ ინტერვიუში ისაუბრა, რომელიც მისი და კოალიციის ლიდერის ბიძინა ივანიშვილის შეხვედრას ეხებოდა.

მისი თქმით, ივანიშვილთან შეხვედრაზე თანამდებობების გადანაწილებაზე საუბარი არ ყოფილა, რადგან ეს მათი მხრიდან უპასუხისმგებლობა იქნებოდა იმ უმძიმესი ბრძოლის წინ, რაც ოპოზიციას 1 ოქტომბერს ელის.

„მთავარია, მოვიგოთ არჩევნები, ამის შემდეგ ექნება აზრი მომავალ გემებზე საუბარს და თანამდებობის განაწილებას“ - აღნიშნა ბურჯანაძემ.

მისივე თქმით, სამწუხაროა ის ფაქტი, რომ ნამდვილი თანამშრომლობა ვერ შედგა, რადგან ერთიანი ფრონტის შექმნის შემთხვევაში, არჩევნები ოპოზიციის გამარჯვებით დასრულდებოდა.

როგორც ბურჯანაძემ აღნიშნა, არჩევნებში მონაწილეობის შემთხვევაში „დემოკრატიული მოძრაობა -ერთიან საქართველოს“ შეეძლო მესამე ადგილი დაეკავებინა, თუმცა, არჩევნებში მონაწილეობაზე უარი პარტიამ ოპოზიციური ხმების გაფანტვის თავიდან აცილების მიზეზით თქვა.

მან ასევე აღნიშნა, რომ ივანიშვილი შეძლებს არჩევნების შედეგად პარლამენტში უმრავლესობით მოვიდეს და არა 30 კაცით.

ბურჯანაძის თქმით, სააკაშვილს გაერთიანებული ოპოზიციის ყოველთვის ეშინოდა, ახლა კი - ხელისუფლებას შესაძლებლობა აქვს ოპოზიციური ხმები გაყოს. მისივე განმარტებით, ხელისუფლებას ჰყავს პარტიები, რომლებსაც ხმებს გადაუნაწილებს და მრავალპარტიულ პარლამენტს მიიღებს, რაზეც დასაველთი მას კარგა ხანს პასუხს ვერ გასცემს.

„მაშფოთებს დასავლეთის დუმული, რაც ადრე ჩვენ გადავიტნეთ და ახლა იმავეს „ქართულ ოცნებას“ უკეთებენ“- განაცხადა ბუჯანაძემ.

მისივე თქმით, დასაფასებელია ბიძინა ივანიშვილის გადაწყვეტილება, მასთან შეხვედრის შესახებ. ბურჯანაძეს მიაჩნია, რომ ეს დემოკრატიაზე მიუთითებს.