პოლიტიკური პარტია „ახალი მემარჯვენეების“ საარჩევნო სიის პირველი ნომერი და პრემიერ-მინისტრობის კანდიდატი პარტიის თავმჯდომარე  დავით გამყრელიძე იქნება.

ამის შესახებ „ახალი მემარჯვენეების“ ერთ-ერთმა ლიდერმა ფიქრია ჩიხრაძემ დღეს გამართულ ბრიფინგზე განაცხადა.

ჩიხრაძის თქმით, გამყრელიძე 12 წელია პოლიტიკაშია, რის გამოც მან უარი თქვა წარმატებულ ბიზნესზე, ოჯახურ სიმყუდროვეზე. ასევე, პოლიტიკაში ყოფნის პირველ პერიოდშივე, მაშინდელ მმართველ პარტიასთან პრინციპული დაპირისპირების გამო თანამდებობიდან გადადგა.

„რაოდენ რთულიც არ უნდა იყოს პოლიტიკური მოცემულობა, ჩვენ არც ამჯერად ვაპირებთ არჩეული გზიდან გადახვევას. ჩვენთვის 2012 წლის საპარლამენტო არჩევნები წარმოადგენს მიჯნას, როცა ქვეყანაში ანომალური პოლიტიკური პროცესები უნდა დამთავრდეს და დაიწყოს ჯანსაღ კონკურენციაზე დაფუძნებული მშვიდობიანი პოლიტიკის ეპოქა“ - განაცხადა ჩიხრაძემ.

მისივე თქმით, „ახალი მემარჯვენეები“ მზად არიან წინასაარჩევნო პერიოდში გამართულ დებატებში მონაწილეობა მიიღონ, როგორც ხელისუფლებასთან, ასევე, ოპოზიციის მხრიდან ყველა კვალიფიციურ სუბიექტთან.

„მზად ვართ, დავჯდეთ ნებისმიერ პოლიტიკურ ძალასთან და საგნობრივ დებატებში მივიღოთ მონაწილეობა, დაწყებული უსაფრთხოების საკითხებიდან დამთავრებული ქართული სოფლით, იმისთვის, რომ ქვეყანაში ერთხელ და სამუდამოდ დასრულდეს სიღატაკე“ - განაცხადა ჩიხრაძემ.

რაც შეეეხება თბილისის მაჟორიტარი დეპუტატობის კანდიდატებს, „ახალი მემარჯვენეები“ მათ მომავალ კვირაში დაასახელებენ.