საარჩევნო ბლოკი „ბიძინა ივანიშვილი-ქართული ოცნება“ არასამთავრობო ორგანიზაციების მიერ შემუშავებულ დეკლარაციაზე ხელმოსაწერად მზად არის.

როგორც დღეს გამართულ პრესკონფერენციაზე კოალიციის პრესსპიკერმა მაია ფანჯიკიძემ განაცხადა, ბლოკი ოფიციალურად მოაწერს ხელს აღნიშნულ დოკუმენტს.

მისივე თქმით, დოკუმენტში მოცემული ჩვიდმეტივე პუნქტის შესრულება ხაზგასასმელია.

პრესსპიკერის თქმითვე, 17 პუნქტიდან ბევრი არ სრულდება, ამის ნათელი მაგალითი კოალიციის მომხრეთა დაჭერა, მათზე ზეწოლა და ტერორია.

„მიუხედავად ამისა ბლოკი „ბიძინა ივანიშვილი-ქართული ოცნება“ უერთდება ამ დოკუმენტს და ხელს მოაწერს“-განაცხადა ფანჯიკიძემ.

მისი თქმით, კამპანიამ „ეს შენ გეხება“ სამართლიანად ჩათვალა 17 პუნქტიან დოკუმენტში ერთი პუნქტის ჩამატება, რომლის შინაარსი შემდეგია - საჯაროდ ვაცხადებთ, რომ ვაღიარებთ სანდო რეპუტაციის მქონე სადამკვირვებლო ორგანიზაციების მიერ არჩევნების ლეგიტიმურად მიჩნეულ შედეგებს.

ფანჯიკიძის განმარტებით, უმნიშვნელოვანესი პუნქტია და „ქართულ ოცნებას“ მიაჩნია, რომ ხელმოწერა უნდა მომხდარიყო მხოლოდ არასამთავრობო ორგანიზაციების მიერ შემუშავებულ ტექსტზე.