კოალიცია „ქართული ოცნების“ ლიდერმა ბიძინა ივანიშვილმა რუსთავის აქციაზე საქართველოს საგარეო და საშინაო პოლიტიკის ნაკლოვანებებზე ისაუბრა და განაცხადა, რომ  დღევანდელი საგარეო პოლიტიკა კომედია და ფარსია.

„ჩვენი ქვეყნის საშინაო პოლიტიკა ტრაგიკულია, ხოლო საგარეო პოლიტიკა კომედია და ფარსია. ორივე უნდა გამოსწორდეს. საგარეო პოლიტიკა უნდა იყოს რეალური, პრინციპული და ამავე დროს მოქნილი, რაც ქვეყნის შიგნით ეკონომიკურ და კულტურულ განვითარებას დაეხმარება“ - განაცხადა ივანიშვილმა.

მისი თქმით, დღეს საქართველოში შემოსავლიანი გახდა ზედაპირულობა და არაპროფესიონალიზმი, რაც უნდა დასრულდეს.

„თვითმარქვიები ვეღარ აღზევდებიან და ვეღარ დააჯდებიან თავზე პატიოსან ხალხს“ - განაცხადა ივანიშვილმა.

ამასთანავე, მან ხელისუფლების ბიზნესთან დამოკიდებულებაზე ისაუბრა და განაცხადა, რომ ეს დამოკიდებულება კარგად წარმოაჩენს, მართლა ზრუნავს თუ არა ის ახალი სამუშაო ადგილების შექმნაზე.

ივანიშვილმა სასჯელაღსრულების სისტემაზე გაამახვილა ყურადღება და განაცხადა, რომ დღეს „ციხეები გადაჭედილია, ხელისუფლებამ მრავალი უდანაშაულო ადამიანი პრობაციონერად აქცია და ეს „ნაციონალური მოძრაობის შემოსავლის“ ერთ-ერთ წყაროდ იქცა“.

მისი თქმით, ხელისუფლებაში კოალიციის მოსვლის შემდეგ სასჯელის შეკრებითობის პრინციპი გადაიხედება.