პოლიტიკური კოალცია „ქართული ოცნების“ ჩოხატაურის მაჟორიტარი დეპუტატობის კანდიდატის თემურ ჭკუასელის განცხადებით, ბახმაროში დოღზე დასასწრებად  არა მხოლოდ „ქართული ოცნების“ წარმომადგენლები, არამედ, ის ადამიანებიც არ დაუშვეს, ვინც მათ მიესალმა.

როგორც „ნიუსპრესთან“ საუბარში ჭკუასელმა აღნიშნა, ბახმაროს შესასვლელი პოლიციას ჰქონდა გადაკეტილი და მანქანებს მხოლოდ ნომრების გადამოწმების შემდეგ უშვებდნენ.

მისივე თქმით, ბახმაროში სალოცავის მოსალოცად და დოღზე დასასწრებად „ქართული ოცნების“ წევრებს ორგანიზებული მსვლელობა არ მოუწყვიათ, მიუხედავად ამისა, პოლიციამ ისინი მაინც არ შეუშვა.

„სააკაშვილის ბრძანებით ბახმაროში, ფერისცვალების დღესასწაულზე დასასწრებად ხალხი „პირველ“ და „მეორე“ კატეგორიებად დაყვეს. ჩვენ „მეორე“ კატეგორიაში მოვხვდით და ამიტომ, პოლიციამ მოგვთხოვა უკან გავბრუნებულიყავით და სალოცავი სხვაგან მოგველოცა“ - აღნიშნა ჭკუასელმა.

„ეს არის ამაზრზენი სიყალბე, რომელიც დღეს ბახმაროში მოხდა. ბახმაროში ფერიცვალების დღესასწაულზე დოღი ათწლეულებია რაც იმართება და არასდროს ხალხი „შენად“ და „ჩემად“ არავის დაუყვია, რაც დღეს სააკაშვილმა გააკეთა“ - განაცხადა „ქართული ოცნების“ მაჟორიტარობის კანდიდატმა.

მისივე ინფორმაციით, ბახმაროში პოლიცია და სპეცრაზმი იყო მობილიზებული.

ბახმაროში ფერიცვალების დღესასაწაულთან დაკავშირებით დღეს საქართველოს პრეზიდენტი მიხეილ სააკაშვილი ჩავიდა.