საქართველოს პრეზიდენტმა მიხეილ სააკაშვილმა ბათუმის პიაცაზე დღეს ახალი „ბუტიკ-სასტუმრო“ გახსნა.

როგორც მიხეილ სააკაშვილმა განაცხადა, მისასალმებელია ბათუმში ქართული ინვესტიციებით, საერთაშორისო სტანდარტების ახალი ბრენდის შექმნა.

მისი თქმით, ახალი სასტუმროდან ძალიან კარგად ჩანს, როგორც ბათუმის მიღწევები ასევე, ბათუმის პრობლემებიც.

პრეზიდენტის განცხადებით, ის მოსახლეობისგან ბევრ წერილს იღებს.

„ხანდახან ასეთ რაღაცას მწერენ: - რაც ეს ანბანის კოშკი, რაც ქუთაისის პარლამენტი ან ახალციხის რაბათი დაგიჯდათ, არ ჯობდა ეს ფული სოფლებში ჩაგედოთ და გზა გაგეკეთებინათ? ეს ყველაფერი რა თქმა უნდა სწორია, მაგრამ მინდა ხალხს ვუთხრა, რომ ყველაზე მოთმენელი ვარ მე. ჩვენი საბოლოო მიზანი ყველა ადამიანის გაჭირვებიდან ამოყვანაა“ - განაცხადა სააკაშვილმა.

მისი თქმით, საქართველო ნავთობისა და გაზის საბადოებზე არ ზის. საქართველო ის ქვეყანაა, რომელსაც შემოსავალი უნდა გაუჩნდეს, ხშირ შემთხვევაში კი ხელოვნურადაც.

„ჩვენ მინუსიდან მოვდივართ. ამიტომ, თუ ჩვენ ანბანის კოშკს და იმ სილამაზეს არ ავაშენებდით, რაც აქ არის, არც ტურისტი ჩამოვიდოდა. ფაქტია, რომ წელს ათჯერ მეტი ტურისტი ჩამოვიდა, ვიდრე ასლან აბაშიძის დროს. წლის ბოლომდე კი კიდევ დიდი დროა“ - განაცხადა მიხეილ სააკაშვილმა.

მისივე შეფასებით, ვიღაცას ასლანისდროინდელი ჩაჟამებული, გაუბედურებული ბათუმი ენატრება. საქართველოს მთავრობა კი ცდილობს, ასეთი ტერიტორიები სიღარიბეს გამოსტაცოს.

პრეზიდენტის განცხადებით, ბათუმში ჯერ ტურისტული ზოლი ვითარდება, შემდეგ კი ტურისტებისთვის ახალი სასტუმროები შენდება.

სააკაშვილის განცხადებითვე, პიაცის „ბუტიკ-სასტუმროს“ ავეჯი მთლიანად ბათუმში მოქმედი კომპანიის მიერაა დამზადებული.