ევროკავშირის საგარეო საქმეთა და უსაფრთხოების პოლიტიკის უმაღლესი წარმომადგენელი ქეთრინ ეშტონი სირიაში არაბულ სახელმწიფოთა ლიგის ერთობლივ  სპეციალურ წარმომადგენლად ლახდარ ბრაჰიმის დანიშვნას მიესალმება.

როგორც ქეთრინ ეშტონის მიერ გავრცელებულ განცხადებაშია აღნიშნული, ლახდარ ბრაჰიმი გამოცდილი დიპლომატია, რომელიც სირიის კრიზისის მოგვარებისთვის სწორედ შესაბამისი პიროვნებაა.

განცხადების თანახმად, ევროკავშირი ამ ამოცანის შესრულების საკითხში მას სრულ თანადგომას გაუწევს.

„მუშაობის დროს ნებისმიერი პოლიტიკური პროცესის წინაპირობა უშიშროების საბჭოს სრული მხარდაჭერა და ყველა მხარის მიერ დიპლომატიის განხორციელების შესაძლებლობის მიცემაა. საერთაშორისო თანამეგობრობას, განსაკუთრებით კი, უშიშროების საბჭოს მოვუწოდებ, სირიაში სპეციალურ წარმომადგენელს ძლიერი და ერთიანი მხარდაჭერა გამოუცხადოს“ - ნათქვამია განცხადებაში.

ეშტონი ასევე, მიიჩნევს, რომ რომელიმე მხარის მიერ კონფლიქტის მილიტარიზაცია სირიის მოქალაქეებს და მთელ რეგიონს უფრო დიდ პრობლემებს შეუქმნის.