საქართველოს პრეზიდენტი მიხეილ სააკაშვილი ბაგრატის ტაძარის აღდგენას ბავშვობის სურვილის ასრულებას უწოდებს. ამის შესახებ სააკაშვილმა დღეს, ბაგრატის  ტაძარზე ჯვრის აღმართვის ცერემონიაზე განაცხადა.

მისი თქმით, ბაგრატის ტაძარი რუსეთის არტილერიამ დაანგრია. სხვა ტაძრის ფრესკები კი, საღებავით გადაღება.

სააკაშვილის განცხადებით, არის დრო ქვების გაბნევის და არის დრო ქვების შეგროვების. ახლა საქართველოს აღმშენებლობის დრო აქვს. ეს აღმშენებლობა კი, პრეზიდენტის თქმით, ყველას ეკუთვნის.

„ოქროს ხანაში შევდივართ. ჟამი გამოცვლის პრეზიდენტებსაც, მთავრობებსაც და ყველასაც, მაგრამ ბაგრატი ხომ დაგვრჩება. ის ხომ სრულიად საქართველოს, პოლიტიკოს და არაპოლიტიკოსს, მორწმუნესაც და არამორწმუნესაც ეკუთვნის, რადგან ის საქართველოს სიმბოლოა“ - განაცხადა მიხეილ სააკაშვილმა და დასძინა, რომ ბაგრატის ტაძარი საქართველოს აღდგენის საწინდარია.

სააკაშვილის შეფასებით, ბაგრატის ტაძრის აღდგენა თითოეული ქართველის ოცნება იყო, რადგან ეს ძველმა მთავრობებმა ვერ შეძლეს.

მისივე თქმით, რამდენიმე დღეში ტაძრის რესტავრაცია საბოლოოდ დასრულდება და თავის პირვანდელ სახეს მიიღებს. უახლოეს მომავალში კი, ფოთის აღდგენილი ტაძარი გაიხსნება.

„მესტიაში ახალი მუზეუმი იხსნება. უახლოეს დღეებში ლაზიკას მშენებლობა იწყება, სადაც ბანის - ჩვენი ისტორიული ძეგლის ასლს ავაშენებთ. ესეც მნიშვნელოვანი ნაბიჯი იქნება იმისთვის, რომ საქართველომ წინ იაროს“ - განაცხადა მიხეილ სააკაშვილმა.

მისივე თქმით, ძველ დროში მთავრობის წარმომადგენლები გუმბათებზე ადიოდნენ, რათა ჯვარი ჩამოეხსნათ და გაენადგურებინათ. დღეს კი, დამოუკიდებელ საქართველოში, მთავრობის მთავარი მოვალეობა შენებაა.

„ახლა კი, არა მარტო მოვალეობა, არამედ მთავრობის ნებისმიერი ხელმძღვანელისთვის განსაკუთრებული პატივია იყოს ის, ვინც ბაგრატის ტაძარზე ჯვარს დააბრუნებს. ამიტომ, მე ამას გავაკეთებ“ - განაცხადა სააკაშვილმა.

ბაგრატის ტაძარზე ჯვრის აღმართვის ცერემონია გაიმართა. მასში მონაწილეობა საქართველოს პრეზიდენტმა მიხეილ სააკაშვილმა მიიღო. ის სასულიერო პირებთან ერთად, ტაძრის გუმბათზე ავიდა და ჯვრის აღმართვის პროცესში ჩაერთო.
ბრინჯაოს ჯვარი, რომელიც არქიტექტორ-რესტავრატორ ვანო გრემელაშვილის ნახაზით დამუშავდა და შეიქმნა, 300 კილოგრამს იწონის და 2 მეტრისა და 14 სმ-ის სიმაღლისაა.
პრეზიდენტის გადაწყვეტილებით, აღნიშნულ ღონისძიებასთან დაკავშირებით, ქუთაისის მთელ ტერიტორიაზე, დღეს დასვენების დღეა.