საქართველოს მტერი თავს დაესხა მხოლოდ იმიტომ , რომ ქვეყანაში აღმშენებლობა მიმდინარეობდა - ამის შესახებ პრეზიდენტმა მიხეილ სააკაშვილმა ახალციხეში, რეაბილიტირებული   ისტორიული ცენტრის გახსნისას განაცხადა.

„ჩვენი მოწინააღმდეგეები ამბობენ, რომ ომი, თურმე ჩვენ დავიწყეთ, მაგრამ შეიძლება ჩვენ გვდომოდა ომი და ნგრევა? ეს შენება ჩვენთვის ყველაფერია, როგორ შეიძლება ომი გვინდოდეს?“ - განაცხადა სააკაშვილმა.

მისი თქმით, საქართველოს მრავალრიცხოვანი მტერი ყავდა და ყავს, „მაგრამ ქართველი არასდროს დაიხევს უკან და არ შეეგუება იმას, რომ ვიღაცის ფეხქვეშ იყოს გადებული“.

„ასეთი წარსულის მქონე ერს, რომელმაც ასეთი კულტურა შექმნა, არ შეიძლება დიდი მომავალი არ ჰქონდეს და ამ მომავალს დღეს ყველანი ერთად ვაშენებთ“ - განაცხადა სააკაშვილმა.

რაბათის გახსნის საზეიმო ცერემონია გუშინ საღამოს გაიმართა. საზეიმო ღონისძიებები ფრანგი მომღერლის, წარმოშობით ახალციხელი ეთნიკური სომეხის შარლ აზნავურის კონცერტით და გრანდიოზული ფეიერვერკით დასრულდა.