ამომრჩეველთა სიების დაზუსტების უზრუნველყოფის კომისიის თავმჯდომარე მამუკა კაციტაძე ევროსაბჭოსა და საქართველოში ნიდერლანდების სამეფოს საელჩოს წარმომადგენლების მიერ კომისიის საქმიანობის დადებითად შეფასებით, კმაყოფილია.

ამის შესახებ მამუკა კაციტაძემ დღეს, „სამართლიანი არჩევნების“ მიერ ჩატარებული კომისიის საქმიანობის მონიტორინგის შუალედური ანგარიშის შედეგების პრეზენტაციის შემდეგ განაცხადა.

მისი თქმით, დღევანდელ დისკუსიაზე, რომელსაც ევროსაბჭოს ოფისის წარმომადგენლებიც ესწრებოდნენ, კომისიის საქმიანობის შესახებ უმნიშვნელო შენიშვნები გამოიკვეთა.

კაციტაძის განცხადებით, მონიტორინგის შედეგად გამოვლინდა, რომ წყვილი რეგისტრატორის ნაცვლად, ზოგიერთ მისამართზე ინდივიდუალური რეგისტრატორები დადიოდნენ. ასევე, იყო ენის ბარიერიც, მაგრამ აღნიშნული პრობლემა ინფორმაციის მიღებიდან ერთ კვირაში გამოსწორდა.

„სასიმოვნოდ აღფრთოვანებული ვარ, როდესაც მონიტორინგიც, დამკვირვებელიც და იდეაში კრიტიკოსიც დადებითად გაფასებს. ერთმნიშვნელოვნად პოზიტიური შეფასებები დაფიქსირდა ევროსაბჭოს, ნიდერლანდების საელჩოსა და ქართული არასამთავრობო ორგანიზაციების მხრიდანაც“ - განაცხადა კაციტაძემ.

მისივე თქმით, კომისიას საკუთარი საქმიანობის 100%-ით ზუსტად განხორციელების, ან 11 100 რეგისტრატორის უშეცდომოდ მუშაობის ილუზია არ ჰქონია.

კაციტაძის შეფასებით, ის ბოლომდე კმაყოფილი მხოლოდ მაშინ იქნება, როცა კომისიის მიმართ საზოგადოების მხრიდან ნდობა გაიზრდება.

მისივე თქმით, სიების დაზუსტებასთან დაკავშირებით, კომისია მე-2 ეტაპს ახორციელებს მეთოდით - „ამომრჩევლიდან სიამდე“, რომელიც 1 სექტემბერს დასრულდება. ამომრჩეველთა ერთიანი სია კი, 14 დღის ვადაში გამოქვეყნდება.

ამომრჩეველთა სიების დაზუსტების უზრუნველყოფის კომისიის საქმიანობის მონიტორინგის შუალედური ანგარიშის შედეგები დღეს სასტუმრო „ბეტსში“ გაიმართა.

კომისიის განხორციელებული საქმიანობა სამი მიმართულებით შეფასდა. კერძოდ, რეგისტრატორთა ტრენინგების მონიტორინგი, რეგისტრატორების შერჩევის მონიტორინგი, „კარდაკარის“ პროცესის მონიტორინგი.

არასამთავრობო ორგანიზაცია „სამართლიანი არჩევნებისა და დემოკრატიის საერთაშორისო საზოგადოების“ მიერ ჩატარებული მონიტორინგის მიხედვით, 26 646 ამომრჩევლიდან 0,66% გარდაცვლილია. სხვა მისამართზეა გადასული - 5,795%, საქართველოში არ იმყოფება - 5,13%, სხვა ქალაქშია გადასული - 6,68%, ხოლო 2,51%-ს მესაკუთრე არ იცნობს.

პროექტ „კარდაკარის“ შედეგების გადამოწმების დროს აღმოჩნდა, რომ 9 ათას 80 ვიზიტისას 26,09%-ის შემთხვევაში ამომრჩეველთა ბინა დაკეტილი აღმოჩნდა, 2,29%-ის შემთხვევაში მისამართი არ არსებობს, რეგისტრირებულ 7,86%-ს კი, არავინ იცნობს.

აღნიშნული მონიტორინგი ევროსაბჭოსა და საქართველოში ნიდერლანდების სამეფოს საელჩოს დაფინანსებით ჩატარდა.