ევროსაბჭოში საარჩევნო პროგრამის მრჩეველი, ელჩი იგორ გაონი ამომრჩეველთა სიების დაზუსტების უზრუნველყოფის კომისიის მუშაობას დადებითდ აფასებს.

ამის შესახებ იგორ გაონმა „სამართლიანი არჩევნების“ მიერ ჩატარებული ამომრჩეველთა სიების დაზუსტების კომისიის საქმიანობის მონიტორინგის შუალედური შედეგების შეფასებისას განაცხადა.

მისი თქმით, „სამართლიანი არჩევნების“ მიერ მონიტორინგი კომისიის საქმიანობის ყველა სფეროს ჩაუტარდა, რის შედეგადაც, შეიძლება ითქვას, რომ ამომრჩეველთა 90% კომისიის საქმიანობით კმაყოფილია.

„ამომრჩეველთა მონაცემები სიაში სრულადაა ასახული. დარჩენილ 10%-თან მიმართებაში, არსებული პრობლემები აღწერის შედეგად უნდა გადაიჭრას, რომელიც არჩევნების შემდეგ უნდა ჩატარდეს“ - განაცხადა იგორ გაონმა.

მისი თქმით, მიღებული შედეგების მიმართ პოზიტიური განწყობა აქვს. ამომრჩეველთა სიებთან დაკავშირებული პრობლემების გამოსასწორებლად კი, მუშაობა მომავალშიც უნდა გაგრძელდეს.

ამომრჩეველთა სიების დაზუსტების უზრუნველყოფის კომისიის საქმიანობის მონიტორინგის შუალედური ანგარიშის შედეგები დღეს სასტუმრო „ბეტსში“ გაიმართა.

კომისიის განხორციელებული საქმიანობა სამი მიმართულებით შეფასდა. კერძოდ, რეგისტრატორთა ტრენინგების მონიტორინგი, რეგისტრატორების შერჩევის მონიტორინგი, „კარდაკარის“ პროცესის მონიტორინგი.

არასამთავრობო ორგანიზაცია „სამართლიანი არჩევნებისა და დემოკრატიის საერთაშორისო საზოგადოების“ მიერ ჩატარებული მონიტორინგის მიხედვით, 26 646 ამომრჩევლიდან 0,66% გარდაცვლილია.

შედეგების მიხედვით, სხვა მისამართზეა გადასული - 5,795%, საქართველოში არ იმყოფება - 5,13%, სხვა ქალაქშია გადასული - 6,68%, ხოლო 2,51%-ს მესაკუთრე არ იცნობს.

პროექტ „კარდაკარის“ შედეგების გადამოწმების დროს აღმოჩნდა, რომ 9 ათას 80 ვიზიტისას 26,09%-ის შემთხვევაში ამომრჩეველთა ბინა დაკეტილი აღმოჩნდა, 2,29%-ის შემთხვევაში მისამართი არ არსებობს, რეგისტრირებულ 7,86%-ს კი, არავინ იცნობს.

აღნიშნული მონიტორინგი ევროსაბჭოსა და საქართველოში ნიდერლანდების სამეფოს საელჩოს დაფინასებით ჩატარდა.