კოალიცია „ქართულ ოცნებაში“ მიაჩნიათ, რომ კახეთში სტიქიის შედეგად ზარალი სამჯერ აღემატება ხელისუფლების მიერ დასახალებულ ციფრს.

ამის შესახებ დღეს გამართულ საგანგებო ბრიფინგზე კახეთის კოორდინატორმა ირაკლი ქადაგიშვილმა განაცხადა.

მისი თქმით, დღეის მდგომარეობით მარტო თელავში ზარალი 5 მილიონამდეა, ხოლო, თელავის სოფლებში - 10 მილიონ ლარს აღწევს.

მისივე თქმით, სტიქიიდან რამდენიმე დღეში კოალიციის მიერ შექმნილმა კომისიამ, რომელიც ზარალს ითვლიდა, ეს პროცესი თითქმის დაასრულა და ზარალის ოდენობა დაადგინა.

„პირველი განცხადება ხელისუფლებამ რეალური გააკეთა და თქვა, რომ ზარალი 150 მილიონს აღწევს. მაგრამ მას შემდეგ, რაც ჯიბეები მოიჩხრიკეს აღმოჩნდა, რომ სარეზერვო 100 მილიონიანი ფონდი განიავებული ჰქონდათ. სწორედ, ამისთვის გადარიცხა 80 მილიონი ლარი ბიძინა ივანიშვილმა“ - განაცხადა ქადაგიშვილმა.

მისივე თქმით, ზარალის რეალური ციფრი დაახლოებით 170 მილიონ ლარამდე მერყეობს, ხოლო, კომპენსაცია, რასაც მთავრობა დაზარალებულებს ურიგებს, საკმარისი არ არის.

პრესკონფერენციას კახეთის რეგიონიდან ჩამოსული დაზარალებული მოსახლეობის წარმომადგენლებიც ესწრებოდნენ. როგორც მათ აღნიშნეს, მიღებული კომპენსაცია - 1 500 ლარი, შხამ-ქიმიკატებისა და სხვადასხვა სამეურნეო სამუშაოების ვალებში დაარიგეს, ზამთრისთვის კი, საარსებო წყარო არ აქვთ.

გლეხების დიდი ნაწილი მოსავლიდან 12-დან 15 ათას ლარამდე მოგებას ელოდა, თუმცა, სტიქიამ მოსავალი სრულად გაუნადგურა.

როგორც თელავის რაიონის სოფელ კურდღელაურში მცხოვრებმა ქალბატონმა აღნიშნა, მისი სახლი მთლიანად დაზიანდა და მიუხედავად იმისა, რომ ხელისუფლება დახმარებას დაჰპირდა, მას ეს არ მიუღია.

კოალიცია „ქართულ ოცნებაში“ აცხადებენ, რომ ხელისუფლება ვალდებულია დაზარალებულებს კომპენსაცია სრულად აუნაზღაუროს.