„ჩვენი გზავნილი, რომელიც ადგილზევე გვქონდა, იგივე რჩება. ჩვენ ეს გზავნილი გვქონდა ყველა ლეგიტიმურად აღშფოთებული ადამიანის მიმართ“, - ამის შესახებ საპარლამენტო უმცირესობის წევრმა, გიგა ბოკერიამ განაცხადა.

მისივე თქმით, „ევროპული საქართველო“ მომხრეა პროტესტისა, რომელიც ლეგიტიმურ ჩარჩოებს არ სცდება.

„ადგილზეც ამას ვცდილობდით, რითაც ბევრი გაბრაზებული ახალგაზრდის უკმაყოფილება დავიმსახურეთ, მაგრამ განმუხტვის ინსტრუმენტი ახლა ხელში ივანიშვილის გუნდს უჭირავს. განმუხტვა მოხდება გახარიასა და კობახიძის პოლიტიკური პასუხისმგებლობით, პროპორციულ არჩევნებზე გადასვლით“, - აცხადებს გიგა ბოკერია.

მისივე თქმით, „ევროპული საქართველო“ საკუთარი აქციის ჩატარებას გეგმავს.

„აქცია 7 საათზე განახლდება. გვექნება მცდელობა, რომ ეს ყველაფერი იყოს მხოლოდ იმ ჩარჩოებში, რაც ჩვენს საზოგადოებას სჭირდება“, - განაცხადა დეპუტატმა.