კოალიცია „ქართული ოცნების“ ლიდერებმა საქართველოში აკრედიტირებულ დიპლომატებს და საერთაშორისო სადამკვირვებლო ორგანიზაციების  წარმომადგენლებს ხელისუფლების მიერ კოალიციის წინააღმდეგ განხორციელებული ქმედებების შესახებ დოკუმენტურად დასაბუთებული ინფორმაცია მიაწოდეს.

ამის შესახებ შეხვედრის შემდეგ ჟურნალისტებს კოალიცის ერთ-ერთმა ლიდერმა ირაკლი ალასანიამ განუცხადა.

„სახელმწიფოს და ხელისუფლების მთავარი მიზანი პრაქტიკულად ყველა რაიონში ის არის, რომ ჩაშალოს და ხელი შეუშალოს კოალიციის საარჩევნო კამპანიას“ - განაცხადა ალასანიამ.

მისივე თქმით, საერთაშორისო თანამეგობრობას მიაწოდეს ინფორმაცია იმის შესახებ, რომ შინაგან საქმეთა სამინისტრო და კერძოდ, კონსტიტუციური უსაფრთხოების დეპარტამენტი, „პოლიტიკური ოპოზიციის წინააღმდეგ სადაზვერვო საშუალებების გამოყენებას“ აგრძელებს.

„სააკაშვილმა პოლიტიკურ ოპონენტებს ფაქტიურად ჟანგბადი გადაუკეტა, რადგან კონკურენტულ გარემოში არჩევნების ჩატარების ეშინია“ - განაცხადა ალასანიამ.

მისივე თქმით, დიპკორპუსისა და საერთაშორისო ორგანიზაციების წარმომადგენლებმა აღნიშნეს, რომ გააგრძელებენ საარჩევნო კამპანიის მონიტორინგს.

როგორც ალასანიამ აღნიშნა, კოალიცია მუდმივად მიაწვდის ინფორმაციას საერთაშორიო თანამეგობრობას და მისგან ადეკვატურ რეაგირებას ელოდება.