პოლიტიკური პარტია „დემოკრატიული მოძრაობა-ერთიანი საქართველოს“ განცხადებით, 1992 წლის 14 აგვისტო საქართველოს ისტორიაში სამუდამო ტკივილად დარჩება.

მოძრაობა ომში დაღუპულთა ხსოვნას პატივს მიაგებს.

„დემოკრატიული მოძრაობა“ პატივს მიაგებს ქართველ და აფხაზ ვაჟკაცთა და ყველა იმ მშვიდობიანი თანამოქალაქის ხსოვნას, რომლებიც სიცოცხლის ფასად იცავდნენ და შეეწირნენ საკუთარ სამშობლოს და ვიმედოვნებთ, რომ უახლოეს მომავალში, ისევ დავიბრუნებთ ქართველები და აფხაზები, ქართველები და ოსები ერთმანეთისადმი ნდობას, აღდგება და გაძლიერდება ურთიერთობა და დავიბრუნებთ ერთმანეთს“ - ნათქვამია პარტიის განცხადებაში.

ამასთან, „დემოკრატიოულ მოძრაობა“ აცხადებს, რომ კონფლიქტების მოგვარების მხრივ არაფერი კეთდება და პრეზიდენტმა მიხეილ სააკაშვილმა და „ნაციონალურმა მოძრაობამ“ დიდი ხანია ამოწურა საკუთარი რესურსი, რადგან მათი განმარტებით, 2008 წელს დღევანდელმა ხელისუფლებამ საკუთარი გაუაზრებელი მოქმედებებით კიდევ უფრო გააღრმავა აფხაზებსა და ქართველებს, ოსებსა და ქართველებს შორის ჩატეხილი ხიდი.

„დემოკრატიული მოძრაობა“ ყველაფერს აკეთებს და მომავალშიც გააკეთებს იმისთვის, რომ გამოიძებნოს აფხაზ და ოს თანამემაულეებთან დიალოგის გზები, რაც ჩვენი ქვეყნის გაერთიანების უპირველესი გარანტია იქნება“ - ნათქვამია პარტიის განცხადებაში.